Almaty sońǵy 10 jylda jalaqynyń ósý qarqyny respýblıkalyq ortasha deńgeıden tómendegen.
QR Premer-Mınıstri Álıhan Smaıylov Almatyǵa jumys sapary barysynda qalanyń áleýmettik-ekonomıkalyq damýy máseleleri boıynsha keńes ótkizdi, dep habarlaıdy Almaty-akshamy.kz Úkimettiń telegram kanalyna silteme jasap.
Úkimettiń baspasóz qyzmeti taratqan málimetterge qaraǵanda, jalaqynyń ósý qarqyny boıynsha Almaty sońǵy 10 jylda respýblıkalyq ortasha deńgeıden tómen bolyp keledi.
«Almatylyqtardyń naqty aqshalaı kiristeriniń jyl saıynǵy ósýin qamtamasyz etý qajet. Bul – keshendi jumys. Eń aldymen, jalaqysy joǵary jańa jumys oryndaryn qurýǵa jáne ınvestısıalar tartýdyń joǵary qarqynyn saqtap qalýǵa kóńil bólý kerek», — dedi Álıhan Smaıylov.
Onyń aıtýynsha, halyqtyń tabysyn arttyrý jumystary ınflásıany tejeý sharalaryn júzege asyrýmen tikeleı baılanysty. Sondyqtan jergilikti alypsatarlardyń áreketi tek qalada ǵana emes, búkil respýblıka boıynsha azyq-túlik pen basqa da taýarlardyń qunyna áser etetindikten, bazarlardaǵy, onyń ishinde «Altyn Ordadaǵy» baǵa belgileýdi jiti qadaǵalaý qajet.
Premer-Mınıstr sonymen qatar básekelestikti damytý úshin Almaty aglomerasıasynyń shyǵys jáne soltústik bólikterinde qosymsha saýda alańdaryn qurý máselesin pysyqtaý, sondaı-aq deldaldyq sqemalardy anyqtaý boıynsha óńirlik komısıanyń tıimdi jumysyn qamtamasyz etý qajettigin aıtty.