17 jeltoqsanda qazaqstandyq UFC faıteri Shavkat Rahmonov (17-0) Las-Vegasta (Nevada, AQSH) UFC 296 týrnırinde jeńiske jetken edi. Búgin sportshy Almatyǵa keldi, - dep habarlaıdy almaty-akshamy.kz.
Jeńispen oralǵan sportshyny Almaty halyqaralyq áýejaıynda qalyń kópshilik sán-saltanatpen kútip aldy.
Tipti olardyń arasynda qazaqy kıimderin kıip, kúımen, ánmen qarsy alǵandar da boldy.
Sportshyny kútip alýǵa buqaralyq aqparat quraldary ókilderi de qatysty.
Aıta keteıik, Shavkat Rahmonovtyń qarsylasy amerıkalyq Stıven Tompson (17-7-1) boldy. Las-Vegastaǵy UFC 296 týrnıriniń basty kartasyndaǵy jekpe-jek 3 raýndqa eseptelgen edi, biraq ol 2-raýndta aıaqtaldy.
Shavkat Rahmonov Stıven Tompsondy qylqyndyrý ádisimen birinshi bolyp jeńgen faıter atandy. Sportshy Táýelsizdik kúni qarsańynda mundaı jetistikke jetkenine oraı Qazaqstan halqyna jyly lebizin de arnaǵan edi.
"Assalaýmaǵaleıkúm, Qazaqstan! Men osyndaı jeńiske jetkenime óte qýanyshtymyn. Qazaqstanymyzdyń Táýelsizdik alǵan kúni. Sondyqtan qýanyshtymyn. Kishkene qobaljyp turmyn. Raqmet úlken. Árıne, Wonerboy - óte myqty qarsylas. Merziminen buryn jeńiske jetkenime qýanyshtymyn. Ózimdi tıtýlǵa beldesýge laıyqtymyn dep oılaımyn", - degen edi Shavkat Rahmonov jekpe-jekten keıin.
Eske salaıyq, buǵan deıin Shavkat Rahmonov UFC reıtıńinde úzdik úshtikke engeni habarlandy. Shavkat buǵan deıin besinshi orynda bolǵan. Otandasymyz jeksenbide Las-Vegastaǵy jeńisinen keıin 3-orynda turǵan amerıkalyq Kolvı Kobıngtondy 2 saty tómen syrǵytty.
