Almatyda ekologıalyq jaǵdaıdy jaqsartý jáne qalany kógaldandyrý maqsatynda respýblıkalyq «Taza Qazaqstan» baǵdarlamasy men «Almaty – bizdiń ortaq úıimiz» qalalyq naýqany aıasynda «Jarqyn kúz» atty kúzgi aksıa ótip jatyr, dep habarlaıdy aqshamnews.kz
Bul aksıa ekologıalyq jaǵdaıdy jaqsartýǵa jáne qalany kógaldandyrýǵa baǵyttalǵan. «Jarqyn kúz» aksıasy qala turǵyndaryna kóshelerdi tazalap, 10 myńnan astam aǵash pen buta kóshetterin otyrǵyzýǵa múmkindik berdi.
Tańerteńnen bastap almatylyqtar belsendi túrde kóshetter otyrǵyzyp, úıleriniń mańynda, kóshe boıynda jáne qalanyń saıabaqtarynda jańa jasyl aımaqtar qurýǵa atsalysty. Búgingi ekologıalyq aksıaǵa 10 myńnan astam qala turǵyny qatysyp, 300-den astam tehnıka men 1755 komýnaldyq qyzmetker jumyldyryldy.
Aýqymdy tazalyq jumystary barysynda rekreasıalyq aımaqtar, saıabaqtar, skverler jáne aýla aýmaqtary tazartylyp, shamamen 4 myń tekshe metr qoqys jınaldy. Jınalǵan qoqys qala ákimdiginiń kúshimen polıgondarǵa shyǵaryldy.
İs-sharanyń negizgi jetistigi – 10 myńnan astam aǵash otyrǵyzý. Otyrǵyzylǵan aǵashtar arasynda alma aǵashy, qaraǵash, akasıa, úıeńki, shegirshin sekildi túrler bar. Bul aǵashtar ALA parkine, Gagarın dańǵyly boıyndaǵy býlvarǵa, Alataý aýdanyna, Jeltoqsan saıabaǵyna, Kókjıek shaǵyn aýdanyna jáne basqa da oryndarǵa otyrǵyzyldy.
Aksıa ótken ýchaskelerde mádenı-oıyn-saýyq baǵdarlamalary da uıymdastyryldy.