Zańsyz saqtalǵan qarý-jaraq, oq-dáriler men jarylǵysh zattardy óz erkimen tapsyrý boıynsha aýqymdy naýqan bastaldy.
Bul týraly Almaty polısıasy málimdedi, dep habarlaıdy Almaty-akshamy.kz.
«Óz erkimen tapsyrý aqshalaı syıaqy úshin júzege asyrylady. İshki ister organdarynda tirkelmegen kez kelgen qarý zańsyz jáne tapsyrylýǵa jatady. Kez kelgen myltyq, tegis uńǵyly, travmatıkalyq atys qarýy aýmaqtyq polısıa basqarmasyna tapsyrylýy tıis. Qarý qabyldanǵan kezde zertteý, qylmysqa qatysy bar-joǵyn tekserý jáne tapsyrylǵan zattyń qunyn baǵalaý úshin krımınalıserge jiberiledi. Sonymen qatar joǵaryda atalǵan zattar adamdy qamaýǵa alý kezinde, sondaı-aq olardy anyqtaý jáne tárkileý boıynsha tergeý áreketterin júrgizý kezinde tárkilengen bolsa, óz erkimen tapsyraýǵa jatpaıtynyn aıta keteıin», – dedi Almaty qalasy PD ákimshilik polısıa basqarmasy azamattyq jáne qyzmettik qarý aınalymyn baqylaý bóliminiń bastyǵy Rahım Tolokýlov.
Búgingi tańda Almaty qalasynyń ishki ister organdaryna azamattardan 23 atys qarýyn, atap aıtqanda, 18 tegis uńǵyly qarýdy, 1 travmatıkalyq qarýdy, 4 myltyq, myltyqqa arnalǵan 60 patrondy tapsyrý týraly 14 ótinish kelip tústi.
«Barlyq tapsyrylǵan qarýlar biriktirilgen derekter bankine sáıkes tekserildi, myltyqtar krımınalısıkalyq saraptamaǵa jiberildi. Aıta keteıin, naýqan barysynda azamattardyń zańsyz saqtalǵan atys qarýyn, oq-dárilerin jáne jarylǵysh zattardy óz erkimen tapsyrýy týraly turǵyndar arasynda aqparattyq-túsindirý jumystary kúsheıtildi. PD-nyń barlyq bólimshelerinde, azamattar kóp jınalatyn oryndarda naýqan týraly aqparattyq stendter ornatyldy», – dedi Tolokýlov.