2025 jyldyń 5 aıynyń qorytyndysy boıynsha Medısınalyq saqtandyrý qory Almaty qalasyndaǵy medısına uıymdaryna almatylyqtardyń alǵan medısınalyq kómegi úshin 76,3 mlrd teńge tóledi. Bul ótken jyldyń sáıkes kezeńimen salystyrǵanda 14%-ǵa artyq.
MÁMS paketinen alynǵan qarajatqa naqty toqtalar bolsaq, shyǵynnyń basym bóligi, ıaǵnı 43,8 mlrd teńgesi stasıonarlyq kómekke, shamamen 2,8 mlrd teńgesi kúndizgi stasıonar qyzmetine, 15,2 mlrd teńge konsýltatıvtik-dıagnostıkalyq qyzmetterge, joǵary tehnologıalardyń kómegimen jasalatyn operasıalarǵa 10,3 mlrd teńge, medısınalyq reabılıtasıaǵa 3,7 mlrd teńge jumsalǵan.
«Mindetti áleýmettik medısınalyq saqtandyrýdyń arqasynda azamattar jyl saıyn túrli hırýrgıalyq otalardy jasatýǵa múmkindik alyp otyr. Olardyń arasynda baǵasyn kópshiliktiń qaltasy kótere bermeıtin qymbat operasıalar da bar. Quny birneshe mıllıon turatyn qymbat otalardy saqtandyrylǵan azamattar tólegen jarnasynyń mólsherine qaramaı jasata beredi. MÁMS júıesindegi ortaq jaýapkershiliktiń máni osynda», – dedi Áleýmettik medısınalyq saqtandyrý qorynyń Almaty qalalyq fılıalynyń dırektory İlıas Muhamedjan.
Mysaly, osy jyly Almaty qalasynda jalpy alǵanda 8,8 mlrd teńgege 2995 operasıa jasalǵan. Bir otanyń quny orta eseppen 3 mln teńgege shyǵady. Sonymen qatar, 1871 neırohırýrgıalyq operasıa jasalǵan. Oǵan Qor 3,2 mlrd teńge tóledi. Tize jáne jambas býyndaryn almastyrý operasıalaryna degen suranys ta óte joǵary. Almatyda 2009 býyn almastyrý otasy jasalypty. Operasıalardyń jalpy quny 3,2 mlrd teńgege jetip jyǵylady
Taǵy da neıro-qan tamyr jáne qan-tamyr júıesine jasaǵan 2083 otaǵa Qor 2,9 mlrd. teńge tóledi. Sonymen qatar, ońtústik astanamyzda jalpy quny 244,7 mln teńgelik 38 baýyr, búırek jáne júrek almastyryldy. Mundaı bir otanyń quny 10 mln teńgege deıin jetip jyǵylady jáne búginde bul shyǵyndar MÁMS qarajaty esebinen ótelip jatyr.
Eń qymbat otalar úshtigi:
1.Implanttalatyn qosalqy júrek júıesi (LVAD) – bul júrekke qandy aıdaýǵa kómektesetin mehanıkalyq qondyrǵy. Ol translantasıany kútip júrgen nemese júregin almastyrýǵa bolmaıtyn naýqastarǵa qoldanylady. Bireýiniń quny – 77,5 mln teńge. 2025 jyly osyndaı 1 ota jasaldy;
2.Júrektiń mıtraldy qaqpaqshasyn almastyrý, quny – 17 mln teńge. 2025 jyly osyndaı 2 ota jasaldy
3.Alogendi gemopoetıkalyq diń jasýshalaryn almastyrý, quny – 17 mln teńge.