Almatylyqtar Gandı saıabaǵynda tamyrymen julynǵan butalarǵa alańdaýshylyq bildirýde, dep habarlaıdy Almaty-akshamy.kz Tengrinews.kz-ke silteme jasap.
«Qazir Gandı saıabaǵyndaǵy barlyq butalardy julyp jatyr. Jumysshylar Saıranǵa kóshiremiz dep otyr (!). Gandı saıabaǵynda jańa butalar otyrǵyzylady deıdi. Quzyrly organdardan bul aqparatty rastaýdy nemese joqqa shyǵarýdy, abattandyrý merzimin belgilep, abattandyrý josparyn jalpyǵa qoljetimdi etýdi suraımyn», - dep jazdy Almaty qalasynyń turǵyny Tatána Golýbeva Facebook áleýmettik jelisindegi «Dejýrnyı po gorodý» tobynda.
Almaty ákimdigi jaǵdaıdy túsindirdi. Qazir Gandı atyndaǵy saıabaqta aýdan ákimdigi jóndeý jumystary aıasynda saıabaqty avtomatty sýarý qurylǵysymen kógaldandyrý jumystaryn bastap ketken.
«Qazirgi ýaqytta japyraqty butalardan qýraǵan jáne eski butalardy alý jumystary júrgizilip jatyr, saıabaqtaǵy qorshaý eski. Júrgizilip jatqan jumystar aıasynda qorshaýdyń jaramdy elementteri Almaly aýdanynyń basqa da qoǵamdyq aýmaqtaryna aýystyrylady», - dep habarlady ákimdikte.
Qala bıligi málimetinshe, bıylǵy saıabaqty aýqymdy abattandyrý kezinde saıabaqtyń kórneki keńistigin ashý arqyly aýmaqtyń jańa tujyrymdamasy men landshafty dızaıny qarastyrylǵan. Tujyrymdamada bede egý, butalar men gúlderdiń ártúrli sorttaryn otyrǵyzý qarastyrylǵan.