Almatylyq Damır Ábdiǵanı qumyrsqa ósiredi.
Onyń asyraǵan eńbekqor jándikteriniń arasynda eldegiden bólek ekzotıkalyq túrleri de bar. Bir qaraǵan adamǵa qumyrsqa ósirý ońaı is kóringenimen, olardyń babyn keltirýdiń ózindik qyr-syry bar. Bul iske jas jetkinshek 12 jasynan bastap den qoıǵan, dep habarlaıdy Almaty-akshamy.kz.
Erekshe hobbı ıesi osyndaı ispen aınalysqanyna qaraǵanda bolashaǵyn ǵylymmen baılanystyratyn shyǵar desek, ol mýzyka salasyn meńgerip júr eken. 18 jastaǵy Damır Ahmet Jubanov atyndaǵy mýzykalyq mektepten bıyl túlep ushqaly otyr. Tipti bolashaq mamandyǵyn da tańdap qoıypty, mýzykalyq baǵytta dybys rejıseri bolǵysy keledi eken. Degenmen, bul qalaýy onyń qumyrsqa ósirip, tipti odan paıda tabýyna kedergi emes.
Bastapqyda balasynyń qumyrsqa ósirýin ata-anasy qoldaı qoımaǵan. Degenmen ýaqyt óte kele, balasynyń izdenisi men qyzyǵýshylyǵyn kórip, oılaryn ózgertken. Uldaryna aqyl-keńesin bere otyryp, súıikti isimen aınalysýy úshin jaǵdaı da jasap bergen. Anasy Raýshan Ánýarbekova óziniń shaǵyn tigin sehynan balasynyń qumyrsqalardy kútip-baptaýy úshin bir buryshyn jasaqtap bergen. Ata-anasy balasyna bul istiń jaı ǵana hobbı emes, tabys ákelýi kerek degen baǵyt-baǵdar bergen eken.
«Árbir hobbıdi bızneske aınaldyrý kerek. Ol tek qana hobbı bolmaýy kerek. Ol saǵan paıda ákelýi kerek. Ol adamnyń soǵan jumsaǵan sonsha ýaqytyn aqtaýy kerek. Sonyń aqysy bolýy kerek degen sıaqty aqyl-keńes berip otyrdyq balamyzǵa», - deıdi anasy.
Osylaısha balasyna qosymsha tabys kózin tabýdyń jolyn kórsetip bergen. Búginde súıikti hobbıinen Damır qosymsha tabys kózin taýyp otyr. Tipti qumyrsqa satyp, ata-anasyna da qarjylaı kómek kórsetken kezderi bolǵan. Bastapqyda ǵalamtordan kórgen jaı qyzyǵýshylyqtan bastalǵan bul isin ol aldaǵy ýaqytta da damyta bermek nıette. Emdik qasıeti bar qumyrsqada alynatyn qyshqylǵa shetel tarapynan suranys kóp eken.
«Qumyrsqalardy ártúrli elderden alamyn. Qytaıdan, Avstralıadan, Evropadan, jáne olardy kóbeıtip, qaıtadan Eýropaǵa, Reseıge satamyn. Sebebi ol - jaqsy tabys kózi. Bir dana qumyrsqany myń dollarǵa satqan kezderim de boldy», - deıdi Damır Ábdiǵanı.
Qumyrsqa satyp alatyn sheteldikter ony kóbine dári-dármek shyǵaratyn zaýyttarǵa ótkizedi. Erekshe kásipti qolǵa alǵan Damırdiń januıasy elimizde syrttan ákelinetin osyndaı jándikterge sertıfıkat alý jaǵy jolǵa qoıylmaǵanyn aıtady. Osy jaǵynan elde zańdastyrý jaıy qolǵa alynsa degen tilekterin aıtty.
Qalaýyn tapsa, qar janar. Jaı ǵana qyzyǵýshylyqtan bastalǵan Damırdiń búginde áleýmettik paraqshasynda odan aqyl-keńes suraıtyn ózi qatarlas jastar, tipti mırmekologıaǵa qyzyǵatyn eresek adamdar da bar eken. Bul Damırdiń kóp izdenýiniń arqasynda tájirıbesi qalyptasyp qalǵan kásibı mamanǵa aınalǵanyn ańǵartady. Jas ta bolsa, izdenistiń arqasynda tabysqa shyqqan jastyń isi kópke úlgi.