Qazaqstandyqtar arasynda 10 gram altyn quıma suranysta.
El turǵyndary 8 tonnaǵa jýyq altyn satyp aldy, dep habarlaıdy aqshamnews.kz QR Ulttyq bankiniń baspasóz qyzmetine silteme jasap.
"QR Ulttyq banki 2024 jyldyń qorytyndysy boıynsha ekinshi deńgeıli bankterge (EDB) jáne banktik emes jekelegen aıyrbastaý pýnkterine jalpy salmaǵy 1,7 tonna 47 395 ólshemeli quıma satty", - delingen habarlamada.
2024 jyly quımalar kóp satylǵan óńirler:
Almaty (32 735 dana, 69 paıyz),
Shymkent (5 200 dana, 11 paıyz)
Qaraǵandy (2 209 dana, 5 paıyz).
"Osylaısha, 2024 jyly ekinshi deńgeıli bankter men banktik emes jekelegen aıyrbastaý pýnkteri keri satyp alýdy eskergende, halyqqa jalpy salmaǵy 2,5 tonna 71 106 quıma satty. Baǵdarlama iske qosylǵaly jalpy salmaǵy 7,9 tonna bolatyn 222 680 altyn quıma satyldy".
Halyq arasynda suranysqa ıe quıma salmaǵy – 10 gram. Jalpy satylǵan kólem ishinde onyń úlesi 25 paıyz – 54 875 dana. Odan keıin 5 gramdyq quıma – 49 145 dana (22 paıyz), 100 gramdyq quıma – 47 943 dana (22 paıyz), 20 gramdyǵy – 40 843 dana (18 paıyz) jáne 50 gramdyq quıma – 29 874 dana (13 paıyz).