«Almaty» mıkroqarjy uıymy («Almaty MQU» JSHS, «Almaty» ÁKK» AQ kompanıalar tobyna kiredi) «Almaty Business-2025» kásipkerlikti damytýdyń óńirlik baǵdarlamasy boıynsha jeńildikti qaryzdar berýdi jalǵastyrýda.
Baǵdarlama sheńberinde mıkro jáne shaǵyn kásipkerlik sýbektileri jyldyq 2% jáne 6% mólsherleme boıynsha nesıeler alady. Aǵymdaǵy jyldyń birinshi toqsanynyń qorytyndysy boıynsha jergilikti bızneske 572 mln teńge somasynda qaryzdar berildi. Nesıelerdiń úshten birinen astamy óndiris jáne qaıta óńdeý salasyndaǵy jobalarǵa tıesili boldy. Sondaı-aq, Halyqqa qyzmet kórsetýge baǵyttalǵan bastamalar (úlesi-21%), týrızm jáne bilim berý salalaryndaǵy jobalar (14%-dan) qarjylandyryldy.
«Almaty» MQU-da bir qaryz alýshyǵa qarjylandyrýdyń eń joǵary somasy 78 640 000 teńgeni quraıdy. Qaryz merzimi - 7 jylǵa deıin. Baǵdarlamaǵa qatysýdyń negizgi sharty — Almaty qalasynyń aýmaǵynda bıznesti tirkeý jáne júrgizý. Óndiris jáne qaıta óńdeý, áleýmettik baǵdarlanǵan kásipkerlik (onyń ishinde bilim berý, sport jáne densaýlyq saqtaý salalaryndaǵy) salalaryndaǵy jobalar, sondaı-aq ımportty almastyrýǵa, eksportqa baǵdarlanýǵa, kreatıvti ındýstrıalarǵa jáne t. b. baǵyttalǵan bastamalar qaraýǵa basym bolyp tabylady.
2019 jyly «Almaty Business-2025» baǵdarlamasy iske qosylǵan sátten bastap «Almaty» MQU shamamen 14 mlrd teńgege 600-den astam jobany qarjylandyrdy.
«Jeńildetilgen nesıeleý aıasynda «Almaty» MQU qalada 2,5 myńnan astam jańa jumys orny quryldy. Kásipkerlik belsendilik pen jumyspen qamtýdyń ósýin yntalandyrýmen qatar, «Almaty Business-2025» baǵdarlamasy qala búdjetine túsetin salyq túsimderiniń ulǵaıýyna yqpal etedi. Máselen, qaryz alýshylar 2019 jyldan bastap 2 mlrd. teńgeden astam salyq tóledi", - dedi «Almaty» MQU Basqarma tóraǵasy Altaı Ismaǵambetov.
Jyldyq tıimdi syıaqy mólsherlemesi jeke-jeke esepteledi jáne 13% - dan aspaıdy. Jeńildetilgen nesıeleý baǵdarlamasy týraly tolyǵyraq +7 (727) 390 80 42 telefony nemese veb-saıt arqyly bile alasyz: https://mfoalmaty.kz