Antonına Lavrınenko Almatyǵa nemeresine qonaqqa kelgen. Túnde ájeı óz bólmesinde qulap, oń jaq san súıeginiń jabyq urshyqastar synyǵy aýyr jaraqatyn alǵan. Mundaı jaǵdaıda shuǵyl hırýrgıalyq aralasý qajet - travmatologtar san súıegi bólikterin ishki bekitý arqyly qaıta ornalastyrady, áıtpese pasıent qozǵala almaı qalýy múmkin.
92 jastaǵy naýqas shetel azamaty, sondyqtan nemeresi kómek izdep birneshe jeke klınıkaǵa barǵan. Jasy men ota kezinde asqyný qaýpine baılanysty ota jasaýǵa ájeıdi eshkim almaǵan.
«Ájem qulaǵan soń ony qalalyq travmatologıalyq ortalyqtyń birine aparyp, alǵashqy medısınalyq kómek aldyq. Ájemniń jasyna baılanysty oǵan ota jasaý usynylmady. Oń aıaqqa derotasıondy etikshe salynyp, kem degende 2 aı tósek demalysy usynyldy. Jeke klınıkada birneshe ret keńes aldyq. Bizge 91 jastaǵy qart adam úshin bul ádispen súıek 6 aıdan astam ýaqyt boıy jazylady, ári saýyǵyp, odan keıin júre alatyny ekitalaı ekenin aıtty. Bul birqatar qaıtymsyz saldarǵa, sonyń ishinde tósek demalysyna baılanysty basqa organdardyń asqynýyna, tipti ólimge ákelýi múmkin eken. Bul rette barlyǵy ájeme ota jasaýǵa keńes berdi, biraq onyń jasyna baılanysty birde-bir jeke klınıka ony qabyldamady. Biz №4 qalalyq klınıkalyq aýrýhanaǵa habarlastyq. Tórtinshi qalalyq aýrýhananyń dárigerleri men medbıkelerinen quralǵan brıgadanyń qatań baqylaýymen búkil tarıhymyzdy zerttep, tekseris, synaqtardan keıin ájemdi emdeýge aldy. Gamma ózekti paıdalanyp, oń jaq san súıegi bólikteriniń jabyq repozısıasy otasy jasaldy. Otadan keıin bir aptadan soń ájemiz arnaıy júris arbasymen júre aldy. Qabyldaý bóliminiń meńgerýshisi Haıroev Magadın Mıkaılovıchke jáne №4 qalalyq klınıkalyq aýrýhananyń ujymyna kásibı sheberligi men iltıpaty úshin kóp RAHMET. Bir jarym aı ótken soń, búgin bizde baqylaý tekserý boldy. Ájem qazir taıaqpen júre alady! Myń alǵys!» - deıdi nemeresi Tımýr.
№4 qalalyq klınıkalyq aýrýhanaǵa 1932 jyly týǵan naýqas oń jaq jambas býyny aımaǵyndaǵy aýrý sezimine jáne oń aıaqtyń tirek fýnksıasynyń buzylýyna shaǵymdanyp túsken. Naýqas jaraqatty bir kún buryn oń jaq jambas býynyna qulap alǵan. Dıagnozy: súıek bólikteriniń yǵysýymen oń jaq san súıeginiń jabyq urshyqastar synýy. Naýqas birden ortopedıalyq hırýrgıa bólimine hırýrgıalyq emdeýge jatqyzyldy.
«Naýqas aýrýhanaǵa jatqyzylǵan kúni biz oǵan shuǵyl jambas súıegi bólikteriniń jabyq repozısıasyn qulyptaýshy ıntramedýllárlyq ımplantpen ishki bekitý otasyn jasadyq. Ota 1,5 saǵatqa sozyldy. Hattamaǵa sáıkes, naýqas aýrýhana jaǵdaıynda aıaǵyna turǵyzyldy, ol júris arbasy kómegimen qozǵala bastady. Al bir aptadan soń jaǵdaıy jaqsaryp, ájeı ambýlatorlyq emdelýge úıge shyǵaryldy», - deıdi №4 qalalyq klınıkalyq aýrýhananyń qabyldaý bóliminiń meńgerýshisi, tájirıbeli travmatolog-ortoped Magadın Haıroev.
Otany qabyldaý bóliminiń meńgerýshisi M.M. Haıroev, asıstent travmatolog-ortoped N.M. Kısakov, anestezıolog-reanımatolog A.E. Bıjanov, otalyq medbıke R.M. Aýbakırova jasady.