«Jumysshy mamandyqtary jyly»
Memleket basshysy 2025 jyldy Jumysshy mamandyqtary jyly dep jarıalady. Almaty elektromehanıkalyq koleji jalpy orta bilim berý, tehnıkalyq jáne kásiptik bilim berý baǵdarlamalaryn júzege asyryp kele jatqan birden-bir oqý oryndarynyń biri. Stýdentter kolej qabyrǵasynda dáris ala otyryp, kásiptik-tehnıkalyq bilim berý aıasynda tıisti mamandyqtar boıynsha tájirıbelik daǵdylardy ıgerýge keńinen múmkindik alady.
Almaty elektromehanıka kolejiniń 4-kýrs stýdentteri bıyl «Elektromehanıkalyq jabdyqtarǵa tehnıkalyq qyzmet kórsetý, jóndeý jáne paıdalaný», «Elektr jabdyqtaryn montajdaýshy», «Avtomobıl kóligine tehnıkalyq qyzmet kórsetý, jóndeý jáne paıdalaný», «Avtomobıl elektr jabdyqtaryn jóndeý jónindegi elektrık (Avtoelektrık)» mamandyqtary boıynsha Germanıanyń jetekshi kompanıalarynda bolyp, óndiristik tájirıbeden ótý múmkindigine ıe bolyp otyr.
Ótken oqý jylynda kolej ujymy birneshe iri kompanıalarmen yntymaqtastyqta óte belsendi jumys jasady. Atap aıtsaq, «Actemium miprotek GmbH», «AMP Leuna GmbH», «SITEX Textile Dienstleistungen Simeonsbetriebe GmbH», «Hans Kupfer & Sohn GmbH» sekildi tanymal nemis kompanıalarymen memorandýmǵa qol qoıylyp, halyqaralyq yntymaqtastyqty damytý jolǵa qoıyldy. Bizdiń mundaı qadamǵa barýymyzdyń basty sebebi – qazirgi zamanaýı tehnologıalardyń damyp, básekelestiktiń beleń alyp otyrǵany. Seriktestiktiń nátıjesinde sheteldik kompanıalarmen tyǵyz baılanys ornap, stýdentter zamanaýı tehnologıalardy meńgeredi. Sondaı-aq, kásibı sheberlikterin shyńdap, halyqaralyq standarttarǵa sáıkes bilim alýyna zor múmkindik týady. Osyndaı ortaq kelisimniń arqasynda 20 stýdentimiz Germanıaǵa tájirıbeden ótýge attandy. Olar Germanıanyń «Actemium miprotek GmbH», «Actemium Cegelec Mitte GmbH, «AMP Leuna GmbH», «SITEX Textile Dienstleistungen Simeonsbetriebe GmbH», «Hans Kupfer & Sohn GmbH» kompanıalarynda tájirıbeden ótip, biliktilikterin arttyratyn bolady.
Atalmysh joba TOO «Janser HR academy» dırektory, Executive MBA, PhD doktory, profesor, Qazaqstan Respýblıkasynyń eńbek sińirgen energetıgi, QR Qurmetti mashına jasaýshysy Haırýlla Qojabaevtyń bastamasymen júzege asyp jatqanyn zor maqtanyshpen aıtamyz. Tanymal tulǵa elimizdegi ınjenerlik-tehnıkalyq mamandardy álemdik deńgeıde daıarlaýǵa erekshe úles qosyp keledi. Sonymen qatar, arnaıy pán oqytýshylary Bulbul Munbaeva, Aınash Toqtymanova, Aıdana Jumamuratovanyń da eńbekterin aıryqsha atap ótkim keledi. Bul rette kolej ata-analary da bizge únemi qoldaý kórsetip, birlese eńbek etip keledi.
El Prezıdenti Qasym-Jomart Toqaevtyń jumysshy mamandyqtarǵa qoldaý kórsetip, tutas bir jyldy arnaýy biz úshin úlken kómek. Bastama aıasynda atalmysh tájirıbe bolashaq mamandardyń bilimin jetildirip qana qoımaı, elimizdiń óndiristik áleýetin arttyrýǵa da zor úles qosatyn bolady. Iaǵnı Germanıanyń iri kompanıalarynda bolyp, tájirıbe jınaý – stýdentterimizdiń kásibı turǵyda damýyna ǵana emes, Qazaqstannyń ındýstrıa salasynyń jańa deńgeıge kóterilýine múmkindik beretinine senemin.
Almaty elektromehanıka koleji osyndaı bastamalar arqyly Jumysshy mamandyqtary jyly sheńberinde sapaly kadrlardy daıarlaý isine qomaqty úles qosady. Bul tek bizdiń kolej stýdentteriniń ǵana emes, búkil elimizdegi tehnıkalyq mamandardyń áleýetin nyǵaıtatyn mańyzdy qadam!