Saǵadat Nurmaǵambetov atyndaǵy Qurlyq áskerleri áskerı ınstıtýtynyń kýrsanttary men Almaty qalasy Almaly aýdany qorǵanys isteri jónindegi basqarmasynyń ókilderi Uly Otan soǵysynyń ardageri Zulharnaı Seıitovti 101 jasqa tolǵan týǵan kúnimen quttyqtady.
Stalıngrad shaıqasynda qan tókken qart maıdanger Belorýssıa men Polshany jaýdan azat etken. Berlınge jetip, Potsdam kóshelerin mınadan tazartýǵa qatysqan, dep habarlaıdy almaty-akshamy.kz.
Qonaqtarǵa rızashylyǵyn bildirgen týǵan kún ıesi jastarǵa aq batasyn berdi.
– Bizdi umytpaǵandaryńa rahmet. Egde jastaǵy adamdar úshin mundaı kezdesýler mereke. Elimizdiń gúldenýin, qazaqstandyqtardyń beıbitshilik pen kelisimde ómir súrýin armandaımyn. Al bolashaq ofıserlerge general bolyp, Otanymyzdyń ıgiligi úshin qyzmet etýdi tileımin, – dedi Zulharnaı Seıitov.
Ardager 1922 jyly 27 jeltoqsanda Omby oblysy, Jańa Qypshaq aýylynda dúnıege kelgen. 1942 jyly Qyzyl Armıa qataryna shaqyrylyp, Sverdlovsk oblysyndaǵy Týrınsk qalasyna áskerı is boıynsha oqýǵa jiberiledi. Sol jyly ol Lenıngrad maıdanyna attanyp, onda 2-shi ekpindi armıa quramynda basqynshylarmen shaıqasty.
Keıinnen saper kýrstary boıynsha arnaıy daıyndyqtan ótedi. Dıversanttar men tártip saqshylarynyń mańyzdy jaýyngerlik jumysyn atqarǵan qyzmettik ıttermen ol Stalıngradtan Belorýssıa men Polsha arqyly ótip, Berlınge jasalǵan shabýylǵa qatysady.
Maıdangerdiń jaýyngerlik eńbegi «Qyzyl Juldyz», II dárejeli «Otan soǵysy» ordenderimen, «Stalıngradty qorǵaǵany úshin», «Erligi úshin», «1941-1945 jyldardaǵy Uly Otan soǵysyndaǵy eren eńbegi úshin» medaldarymen marapattalǵan.
Soǵystan keıin Zulharnaı Seıitov Omby aýyl sharýashylyǵy ınstıtýtyn bitirip, Qazaqstanǵa jiberiledi. Munda ol bıologıa ǵylymdarynyń doktory jáne akademık boldy. Áriptesterimen birge «Qazaq bálzamy» jáne «Altynsý» emdik sýsyndaryn ázirleýge qatysty. Qymyz, shubat, bıe jáne túıe sútin qurǵaq daıyndaý tehnologıalaryn jasady.
Eńbek sińirgen ǵylym qaıratkeri Zulharnaı Seıitov 150-den astam ǵylymı jumystar men monografıalardyń, 14 patent pen 8 avtorlyq kýáliktiń, 10 oqý quralynyń, onyń ishinde qazaq, orys jáne aǵylshyn tilderindegi «Bıohımıa» oqýlyǵynyń avtory. Onyń kóptegen ázirlemeleri men jańalyqtary búginde medısınada da, tamaq ónerkásibinde de keńinen qoldanylady.