Almatyda 6 jastan 18 jasqa deıingi shahmatshy jastar arasynda klasıkalyq, rapıd jáne blıs shahmat boıynsha Qazaqstan chempıonaty óz máresine jetti. Týrnırge Qazaqstannyń 17 óńiri men 3 qalasynan 950 jas shahmatshy qatysty, dep habarlaıdy aqshamnews.kz
Astana qalasynyń órenderi úzdik atanyp, 17 altyn medal jeńip aldy. Onyń ishinde klasıkadan – 6, rapıdten – 5, blısten – 6 altyn. Sonymen qatar, Almaty, Almaty oblysy, Aqtóbe, Túrkistan jáne Pavlodar oblystarynyń shahmatshylary da júldeli oryndardan kórindi.
Almatylyq shahmatshylar erekshe nátıjege qol jetkizdi. 6 jasqa deıingi jas sanatynda Makar Chernyshov jáne 12 jasqa deıingi jas sanatynda Danıs Qýandyquly shahmattyń barlyq úsh túri boıynsha altyn medal jeńip, "absolútti chempıon" atandy. Bul jetistikke Almaty oblysynyń shahmatshylary Jansaıa Sholpanbek pen Elnaz Qalıahmet te qol jetkizdi.
Klasıkalyq shahmattan chempıon atanǵan jasóspirimder Grýzıanyń Batýmı qalasynda ótetin álem kýbogynda, sondaı-aq jas erekshelikterine qaraı álem chempıonattarynda Qazaqstannyń namysyn qorǵaıdy. Ekinshi oryn ıegerleri Taılandta ótetin Azıa chempıonatyna qatysady. Al júldeli oryndarǵa ıe bolǵan basqa shahmatshylar oqýshylar arasyndaǵy álem jáne Azıa chempıonattaryna, sondaı-aq Batys Azıa chempıonatyna joldama aldy.
Bul chempıonat Qazaqstanda shahmattyń qarqyndy damyp kele jatqanyn jáne jas talanttardyń halyqaralyq arenada laıyqty óner kórsetýge daıyn ekenin kórsetti.