Belsendi demalys áýesqoılary qandaı erejelerdi jıi elemeıdi, taýǵa qalaı durys daıyndalý kerek jáne eń aldymen ózińizben birge ne alý kerek, osy suraqtardyń barlyǵyna Almaty Óńirlik komýnıkasıalar qyzmetiniń brıfıńinde QR TJM Respýblıkalyq jedel-qutqarý jasaǵynyń qutqarýshylary jaýap berdi.
Jaıaý serýendeý kezinde qaýipsizdikti qamtamasyz etý úshin, eń aldymen, jurý baǵytyn josparlap, ol týraly tanystaryńyz ben jaqyndaryńyzǵa aıtyp, habardar etý kerek, deıdi RJQJ bas qutqarýshysy Vadım Pak.
«Taýǵa shyǵýdy josparlamas buryn, júrý baǵytyn anyqtaý kerek, toptyń sanyn esepteý kerek, aldaǵy sapardyń barlyq erekshelikterin tolyq bilý kerek: shyǵatyn ýaqyt, qaıtatyn ýaqyt, marshrýttyń kúrdeliligi jáne t.b. Bul jerde jıi kezdesetin qatelik - jaqyndary men tanystarǵa eskertpesten, úndemeı ketý. Apat bolǵan jaǵdaıda zardap shegýshini tezirek tabý úshin marshrýtty, turaqtaǵan oryndardy anyqtaýǵa kóp ýaqyt ketedi», - dep bólisti ol.
Odan keıingi eń mańyzdy jaıt – qajetti jabdyqty daıyndaý. Qutqarýshylardyń usynysy boıynsha, rúkzakta ár týrıste tótenshe jaǵdaılarǵa arnalǵan alǵashqy kómek qobdıshasy, qosalqy batareıalary bar shamdar men basqa da jaryqtandyrǵyshtar, qýattaǵysh quraldar, sý jáne jeńil taǵamdar bolýy kerek. Taýlardaǵy qubylmaly aýa-raıyn eskere otyryp, aýystyrýǵa bolatyn jyly kıim de artyq bolmaıdy.
«Taýda aýa temperatýrasy qalaǵa qaraǵanda áldeqaıda tómen. Taýǵa shyǵatyndardyń jiberetin qateligi - olar ózderimen birge jyly, aýystyrýǵa bolatyn kıimderdi almaıtyndyǵynda. Óıtkeni taýǵa shyqqanda adam qatty terleıdi, sodan keıin ol jel tıip, sýyq tıýi múmkin», - dep atap ótti spıker.
Eger týrıs tótenshe jaǵdaıǵa tap bolsa, qutqarýshylardy shaqyrý úshin 112 nómirine qońyraý shalý kerek. Baılanys bolmaǵan jaǵdaıda, týrıser osy maqsattar úshin salynǵan lashyqtardy panalap, qutqarýshylarly kúte alady. Qutqarý lashyqtary taýly marshrýttardyń jıi baratyn ýchaskelerinde ornatylǵan.
«Eger taýda baılanys bolmasa, qazir Almaty qalasynyń TJD-men birlesip, týrıs nemese týrıser toby sýyqtan, qolaısyz aýa-raıynan biraz ýaqyt panalaı alatyn qutqarý lashyqtary salynǵan. Iaǵnı, kómek kúte alady nemese qarańǵy ýaqytta sol jerge túneı alady. Ári qaraı, eger kún shyqsa, marshrýt boıynsha úıge qaraı júrgen durys. Eger adasyp qalsa, onda sol orynda qalý kerek. Eger baılanys bolsa, qutqarýshylardy qaıtadan shaqyrý kerek nemese ádette jaqyn mańdaǵy túnegen lashyqtarda aqparattyq tirekterdegi telefon nómirlerin paıdalaný kerek», - dep atap ótti V. Pak.