Týrıser qaıtar jolda adasyp, qarańǵyda tómenge túse almaǵan
2023 jylǵy 26 naýryzda saǵat 23:32-de Almaty TJD kezekshi-dıspecherlik bólimine "Aıýsaı" shatqaly men sarqyramasynyń aýmaǵynda taýda er adam men áıel adam joǵalyp ketti degen habarlama kelip túsken, dep habarlaıdy Almaty-akshamy.kz.
Almaty tótenshe jaǵdaılar departamentiniń baspasóz qyzmetiniń málimetinshe, týrıser qaıtar jolynan adasyp, qarańǵyda tómenge túse almaǵan. Olar ózderi kómek surap habarlasqan.
"Adasqandardyń ornalasqan jeri týraly málimet Almaty ákimdigi qutqarý qyzmetiniń jedel kezekshisine jiberildi. 4 qutqarýshy bir tehnıkamen izdeý-qutqarý jumystaryna jolǵa shyqty. İzdeý ornyna kelgen kezde, adamdardyń izderi bolǵan joq, atalǵan jerde az kólemdi kóshkin boldy", - delingen habarlamada.
Arada bir saǵat ótkennen keıin, joǵalǵan er adam TJD kezekshi bólimine qaıta qońyraý shalyp, olar joldy taýyp, kóterile bastaǵandaryn habarlaǵan, sóıtip, baılanys qaıtadan úzilgen. Túnde saǵat 4:20-da "Aıýsaı" shatqalyna qosymsha qutqarý qyzmetiniń jáne KSP "Tuıyq-Sý" 7 qutqarýshysy men 2 birlik tehnıkasy jiberilgen. Týrıser qaıtyp baılanysqa shyqpaǵan.
"06.00-de TJM Respýblıkalyq jedel-qutqarý jasaǵynyń 7 adamnan qurylǵan jedel tobyn, onyń ishinde bir kınologıalyq esepti izdeýge jiberý týraly sheshim qabyldandy. Respýblıkalyq jedel-qutqarý jasaǵynyń qutqarýshylary spýtnıktik baılanyspen jaraqtalǵan. Kosmostansıaǵa kelgen Respýblıkalyq jedel-qutqarý jasaǵynyń qutqarýshylary shatqaldan tómen qaraı izdeý jumystaryn júrgize bastady. Táýliktiń qarańǵy ýaqytynda, qaýipti tik betkeılermen, tómengi temperatýrada joǵalǵan týrıserdi izdeý jumystary toqtaǵan joq", - delingen habarlamada.
İzdeý jumystary tań boıy jalǵasqan. Saǵat 09:57-de qutqarý qyzmetiniń izdestirý toby týrıserdi taýdyń jotasyndaǵy birinshi sarqyramadan joǵary ornalasqan "Aıýsaı" shatqalynan tapty. Zardap shekkendermen vızýal baılanys ornatyldy. Sodan keıin qutqarý operasıasy jalǵastyryldy. Jumysty tik betkeıler men qardyń kóptigi qıyndatty.
Saǵat 15:45-te qutqarý qyzmetiniń qutqarýshylary men Respýblıkalyq jedel-qutqarý jasaǵynyń jedel toby zardap shekkenderdi Apattar medısınasy ortalyǵynyń dárigerler brıgadasyna jetkizdi. Zardap shekkender medısınalyq kómekke muqtaj emes.