Almaty qalasy boıynsha qylmystyq-atqarý júıesi departamentiniń qyzmetkerleri qyzmet babynda qaza tapqan áriptesteri A.Sabyrbekovtiń rýhyna taǵzym etip, eske aldy, dep habarlaıdy Almaty-akshamy.kz.
Qylmystyq-atqarý júıesinde qyzmet atqarý – qaýiptiń ótinde, qaterdiń qasynda júrý degen sóz. Nebir qanquıly qylmyskerler shoǵyrlanǵan jerde jaıbaraqat júremin degen jáı sóz. Oǵan dálel – biren-saran bolsa da sottalǵandardyń qolynan qaza tapqan qylmystyq-atqarý júıesiniń qyzmetkerleri bar. Solardyń biri – Aıdarbek Sabyrbekov. Dáriger mamandyǵyn alǵan soń, Aıdarbek júrek qalaýymen ishki ister organdaryna kelgen edi. Qylmystyq-atqarý júıesine qarasty túzeý mekemelerinde dáriger mamandyǵy qashan da suranysqa ıe. Sondyqtan da Aıdarbek qazirgi №11 mekemesiniń feldsheri laýazymyna taǵaıyndalady. Bul elimizde qylmystyq ahýaldyń bir kúrdeli kezeńi bolatyn. Ásirese aýyr qylmys jasaǵany úshin kolonıalarda jastar jaǵy basym edi. Tipten kámelettik jasqa tolmaǵan jasóspirimderdiń aýyr qylmysqa barýlary jıilegen kez osy eki myńynshy jyldardyń basy bolatyn desek, artyq aıtpaımyz. Al Almatydaǵy balalar kolonıasy - osyndaı jasóspirimder jazasyn óteıtin mekeme.
Aıdarbek Sabyrbekov ózi qalap kelgen qyzmetine qulshyna kiristi. Qylmystyń quryǵyna ilinip, endi sonyń jazasyn ótep júrgen jasóspirimderdiń densaýlyǵyn baqylaýdy, aýyryp qalǵandaryn emdeýdi bar yntasymen atqaryp, jasóspirimderge janashyrlyq tanytýdan jalyqpady. Osy bir qaǵylez, qandaı tapsyrma bolsa da tap-tuınaqtaı etip oryndaıtyn jigitti ujymdaǵylar “Bizdiń dáriger aǵaı” dep atap ketip edi. Ókinishke oraı, ishki qyzmet kishi leıtenanty Aıdarbektiń ómiri nebári 26 jasynda úzildi. 2000 jyldyń 30 qarashasynda ol qyzmettik mindetin atqarý kezinde saǵat 22.30 shamasynda qashyp bara jatqan jasóspirimderdi toqtatý kezinde sottalǵan balalardyń qolynan qaza tapty. A. Sabyrbekovke qaza tapqannan keıin “ishki qyzmet leıtenanty” arnaıy ataǵy berildi jáne Qazaqstan Respýblıkasy Prezıdentiniń Jarlyǵymen “Erligi úshin” medalimen marapattaldy. Ózi qyzmet atqarǵan Almaty qalasyndaǵy balalar kolonıasynda erjúrek dárigerge arnalǵan burysh ashylyp, QAJD ǵımaratynyń aýmaǵynda eskertkish qoıyldy. Áriptesteri Aıdarbektiń esimin ár mereke saıyn eske túsirip, rýhyna taǵzym etip turady.