Jábir kórgen azamat shapshań túrde stasıonarlyq modýldik post qyzmetine shaǵymdanǵan.
Almatydaǵy stasıonarlyq modýldik postta otyrǵan polısıa saqshysy kóshedegi qaraqshylardy ustady, dep habarlaıdy Almaty-akshamy.kz.
İshki ister mınıstrliginiń resmı saıtyndaǵy málimet boıynsha, jergilikti turǵyn polısıaǵa qylmys týraly habarlaǵan. Er adamnyń aıtýynsha, «Saıran» avtovokzaly aımaǵyndaǵy aıaldamada belgisiz eki adam oǵan jaqyndap, kúsh qoldaný arqyly uıaly telefony men aqshasyn alyp ketken.
Mamandardyń aıtýynsha, tonaýshylar qylmys ornynan qashyp ketýge tyrysqan. Biraq jábirlenýshiniń stasıonarlyq modýldik postta qyzmet etken polısıa qyzmetkerine der kezinde júginýi sheshýshi ról atqarǵan. Polısıa qyzmetkeri kúdiktilerdiń ekeýin de «izin sýytpaı» ustady.
«Qolǵa túsken 38 jastaǵy K. jáne 29 jastaǵy H.esimdi azamattar óz kinálaryn moıyndady. Zattaı aıǵaqtar tárkilendi jáne ıesine qaıtaryldy. Qazirgi tańda qylmyskerler ýaqytsha ustaý ızolátoryna qamaldy. Osy fakt boıynsha QR QK-niń 191-baby 2-bóliginiń 1,3-tarmaqtary boıynsha sotqa deıingi tergeý júrgizilýde. Kúdiktilerdiń osyǵan uqsas qylmystarǵa qatystylyǵy anyqtalýda», – dedi Áýezov aýdandyq polısıa basqarmasynyń bastyǵy Ulan Ábilqaıyr.
