Balalar Izraıldiń eń myqty komandasyn jeńip shyqty
Úndistannyń Pýna qalasynda ótken FIRST Tech challenge India Championship 2023 robototehnıka jarysynda Qazaqstan atynan Almaty qalasynyń №81 mamandandyrylǵan mektep oqýshylary óner kórsetti, dep habarlaıdy Almaty-akshamy.kz.
USTEM Robotics qoǵamdyq qorynyń habarlaýynsha, eki kúndik jarystyń qorytyndysy boıynsha qazaqstandyq oqýshylar irikteý machtarynda jeńilissiz óner kórsetip, joǵary úsh marapatqa ıe boldy.
Finalist Alliance Captain Award - fınaldyq machtar barysynda Alánsty basqarǵany úshin arnaıy marapat;
Innovate award - Robot jasaýdaǵy ınovasıalyq tásil úshin eń joǵary ınjenerlik marapat;
Rookie Inspiration - jańadan kelgen komandaǵa beriletin eń joǵary marapat.
«Biz bul sapardan úlken tájirıbe aldyq. Balalar Izraıldiń eń myqty komandasyn jeńip shyqty. Álemdik arenaǵa alǵash ret shyqqan komanda úshin bul úlken jetistik. Qazylar alqasy da balalardyń jumysyn joǵary baǵalap, birden úsh marapat tabystady» – dedi jattyqtyrýshy Bekzat Amanov.
Aıta keteıik, Úndistannyń Pýna qalasynda ótken FIRST Tech challenge India Championship 2023 robototehnıka jarysyna 5 elden 70 komanda jınaldy. Qazaqstan, Úndistan, Izraıl, Reseı jáne Rýmynıa memleketteriniń oqýshylary arasynan úzdikter anyqtaldy.