Almatylyq oqýshylar robototehnıka salasynda halyqaralyq deńgeıde úlken jetistikterge jetýde
Almatyda robototehnıka salasy qarqyndy damýda, bul óz kezeginde aıtarlyqtaı nátıjelerge ákelip otyr. Almatylyq oqýshylardyń osy saladaǵy sońǵy jetistikteri týraly jańalyqtar Óńirlik komýnıkasıalar qyzmetiniń brıfıńinde aıtyldy, dep habarlaıdy aqshamnews.kz
Almaty qalasy Jastar saıasaty basqarmasynyń basshylyǵymen 100-den astam demalys ortalyqtary jumys isteıdi, olardyń tárbıelenýshileri respýblıkalyq jáne halyqaralyq jarystarda únemi júldeli oryndardy ıelenip keledi. Tek ótken aıda ǵana Almatydan 100-den astam oqýshy robototehnıka jarystaryna qatysyp, onyń ishinde 24 AQSH-ta ótken halyqaralyq chempıonatta bas báıgege ıe boldy.
Oqýshylardyń jetistikteri týraly Robotics & Artificial Intelligence (RAI) demalys ortalyǵynyń dırektory Bekzat Amanov tolyǵyraq málimet berdi.
«Kalıfornıa shtatynyń Los-Andjeles qalasynda ótken «Robo Tourney International Championship 2024» halyqaralyq chempıonatynda bizdiń tárbıelenýshil úzdik nátıje kórsetti. Jarysqa álemniń túkpir-túkpirinen 200-den astam talantty oqýshylar qatysty. Bizdiń komandalar joǵary daıyndyq deńgeıin kórsetip, halyqaralyq arenada básekege qabiletti ekenin dáleldedi», - dep bólisti ol.
Komanda quramyndaǵy eki oqýshy, Demeýgalıeva Mıra men Asylhanýly Serimjan maýsymaralyq «Dedication Award» júldesiniń jeńimpazdary atandy. Bekzat Amanov, Ernar Joldasov, Serik Tólenov jáne Birlik Sagıtjanov jattyqtyrýshylar arasynda «Coach/Mentor Award» nomınasıasynyń jeńimpazdary atandy.
«Eki qazaqstandyq komandanyń jetistikteri olardyń halyqaralyq arenada básekege qabiletti ekenin kórsetedi. Demalys ortalyǵynyń tárbıelenýshileri jarystyń eki kúninde de óz ónerlerimen kóshbasshylar qatarynda boldy. Komandalar Qazaqstan Respýblıkasy Oqý-aǵartý Mınıstrliginiń qoldaýymen Ustem Foundation qoǵamdyq qory men "Daryn" RǴPO uıymdastyrǵan Central Asia FIRST Championship Ortalyq Azıa chempıonaty barysynda Álem chempıonatyna joldama aldy. Chempıonattaǵy jeńis bizdiń tárbıelenýshilerge álemdik joǵary oqý oryndaryndaǵy granttarǵa qol jetkizýge múmkindik beredi», - dep qosty B. Amanov.
124-komandanyń kapıtany Mıra Demeýgalıeva da bedeldi halyqaralyq jarystarǵa qatysý tájirıbesimen bólisti.
«Meniń robototehnıka salasyndaǵy jolym FIRST Global Challenge (FGC) jarysyna qatysýdan bastaldy. Bul tájirıbe maǵan komanda kapıtany bolyp, lıderlik qasıetterimdi damytýǵa shabyt berdi. Men baǵdarlamalaý, 3D-modeldeýdi úırenip, robototehnıka salasyndaǵy bilimimdi tereńdettim», - dep atap ótti ol.
Brıfıńke qatysqan Jastar saıasaty basqarmasynyń jastardy áleýmettendirý jáne jastar bastamasyn qoldaý bóliminiń basshysy Nursultan Bekqaıyrov demalys ortalyqtary jastardyń talanttaryn damytyp,olardyń áleýmettik beıimdelýine úlken múmkindik beretinin atap ótti.
«Demalys ortalyqtarynyń jumysy qalamyzdyń jastary úshin turǵylyqty mekenjaıy boıynsha ártúrli úıirmeler men kýrstardy uıymdastyrý arqyly júzege asyrylady. Munda barlyq qyzmet túri tegin. Ortalyqqa negizgi kelýshiler 14 pen 18 jas aralyǵyndaǵy jastar. Atalmysh ortalyqtar búginde qalamyzdyń 12 myńnan astam jastaryn qymtyp otyr, onyń ishinde halyqtyń áleýmettik osal toptaryndaǵy jastary da bar», - dep málimdedi ol.
2024 jyly demalys ortalyqtarynyń jumysyn jańartý jumystary jalǵasýda. Olardyń qyzmeti aýdandar boıynsha ortalyqtandyrylǵan. Jastar úshin ózekti degen qosymsha úıirmeler men kýrstar ashyldy, ortalyqtardyń ishki jáne syrtqy dızaıny men jabdyqtalýy boıynsha jumystar júrgizilip, árbir DO-da tegin qazaq tili kýrstary ashyldy.