Almatylyq oqýshylar matematıka jáne mehanıka boıynsha halyqaralyq baıqaýda jeńiske jetti.
Almaty qurama komandasy Ó.Joldasbekov atyndaǵy matematıka jáne mehanıka boıynsha XII halyqaralyq ǵylymı jobalar baıqaýynda 4 altyn, 2 kúmis jáne 4 qola medal jeńip aldy. Baıqaýǵa Tájikstan, Qyrǵyzstan jáne Qazaqstannan 150-den astam oqýshy qatysqan, dep habarlaıdy Almaty-akshamy.kz
Jarys Almatyda 1-3 naýryz aralyǵynda ál-Farabı atyndaǵy Qazaq ulttyq ýnıversıtetiniń mehanıka-matematıka fakúltetiniń bazasynda ótti.
Baıqaýǵa qatysýshylar matematıka, qoldanbaly matematıka, mehanıka jáne ekonomıkadaǵy matematıkalyq ádister syndy birneshe seksıa boıynsha ǵylymı joba qorǵady. Saıys barysynda oqýshylar jobasyn tanystyryp, ereksheligin aıtty.
«Mektep oqýshylarynyń jeńisine árdaıym qýanamyz. Búgin olar taǵy da júldeli oryndarǵa ıe boldy. Olardy jeńisterimen quttyqtaımyz! Bilim alýǵa degen ynta eshqashan sónbesin. Halyqaralyq baıqaý jyl saıyn ǵylymı-zertteýge qyzyǵýshylyq tanytqan daryndy oqýshylardy anyqtaý úshin ótkiziledi. Osylaısha, naqty ǵylymdy zertteýge yntalandyramyz», – dedi Almaty qalasy bilim basqarmasynyń basshysy Lázzat Jylqybaeva.
№159 gımnazıanyń oqýshylary Abaı Baǵjan men Jóken Dıar, sonymen qatar, № 178 mamandandyrylǵan lıseıdiń oqýshylary Muqash Ermuhan men Áýbákir İńkár jeńimpaz atandy.
Al № 178 mamandandyrylǵan lıseıdiń eki oqýshysy – Jalǵasbek Adal jáne Aıajan Maratova kúmis júldeger atandy.
Úshinshi oryndy №159 gımnazıanyń oqýshylary Erasyl Esengeldın, Nuraly Oralbekov, Janbota Dáýlenhan jáne №39 mamandandyrylǵan lıseıdiń oqýshysy Oljas Maısyuly ıelendi. №83 gımnazıanyń oqýshysy Aıaýlym Shaıahmet qatysqany úshin gramota aldy.
Aıta keteıik, byltyr 70-ke jýyq almatylyq oqýshy halyqaralyq baıqaýlarǵa qatysyp, 43 oqýshy júldeli oryndar alǵan.