Almaty ákimi Erbolat Dosaev Olımpıada oıyndarynyń júldegerlerin aqshalaı jáne turǵyn úı sertıfıkatymen marapattap, avtokólikterdiń kiltin tabys etti, dep habarlaıdy aqshamnews.kz
Almaty ákimi Erbolat Dosaev Parıjde ótken Olımpıada oıyndaryna qatysqan almatylyq sportshylarmen kezdesti.
Shahar basshysy sportshylar men jattyqtyrýshylardy Olımpıadanyń kúmis júldegeri – gımnast Narıman Qurbanovty, qola júldegerler - dzúdoshy Ǵusman Qyrǵyzbaevty, boksshy Nazym Qyzaıbaıdy jáne oq atýdan saıysqa túsken mergender Aleksandra Le men Islam Sátbaevty jetistikterimen quttyqtady.
«Ulttyq qurama sapynda óner kórsetken almatylyq sportshylardyń Qazaqstan qorjynyna kóp medal salǵany qýantady. Talanttaryńyzdyń, tabandylyǵyńyzdyń jáne eńbekqorlyǵyńyzdyń arqasynda sizder mańyzdy da tarıhı jeńiske qol jetkizip, halyqtyń ystyq yqylasyna ıe boldyńyzdar, álemdik sporttyń damýyna úles qostyńyzdar. Sizder súıikti isińiz ben týyp-ósken elińizge degen súıispenshiligińizdiń jarqyn úlgisisizder», - dedi Almaty ákimi.
Erbolat Dosaev Narıman Qurbanovqa eki bólmeli páterdiń, al Ǵusman Qyrǵyzbaevqa, Nazym Qyzaıbaıǵa, Aleksandra Le men Islam Sátbaevqa bir bólmeli páterdiń sertıfıkatyn tabys etti. Sonymen qatar, sportshylarǵa 5 jáne 4 mıllıon teńgeden aqshalaı sertıfıkattar jáne jańa avtokólikterdiń kilti tabystaldy. Ákimdik bergen turǵyn úı sertıfıkatymen birge Narıman Qurbanovqa demeýshiler esebinen taǵy bir páter syıǵa berildi.
Olımpıadada eldiń namysyn qorǵaǵan barlyq almatylyq sportshy men bapkerler quramy aqshalaı sertıfıkattarmen marapattaldy.
Kezdesýde olımpıadashylar almatylyqtar men búkil Qazaqstan halqynyń qoldaýyn sezingenin, jarys kezinde jigerin janyp, jeńiske jetelegenin aıtty. Sondaı-aq, olar qala basshysy Erbolat Dosaevqa nazardan tys qaldyrmaı, ákimdik tarapynan kóńil bólgeni úshin alǵys bildirdi.
Esterińizge sala keteıik, 2024 jyldyń 26 shildesinen 11 tamyzyna deıin Parıjde ótken XXXIII jazǵy Olımpıada oıyndarynda almatylyq sportshylar 1 kúmis jáne 3 qola júlde, jalpy jıyny 4 medal jeńip aldy.
Anyqtama úshin: «Astana Motors» jáne «Orbis Auto» kompanıalarynyń demeýshiligimen Narıman Qurbanov Hyundai Santa Fe avtokóligin, Ǵusman Qyrǵyzbaev pen Islam Sátbaev Hyundai Tucson krosoverin, Nazym Qyzaıbaı men Aleksandra Le Zeekr X jol talǵamaıtyn kóligin aldy.
