Almatylyq neırohırýrgter naýqastyń omyrtqasyna aýyrýdy basatyn elektrod ornatty
Ońtústik astanadaǵy Ortalyq qalalyq klınıkalyq aýrýhanada tuńǵysh ret omyrtqaǵa julyn stımýlátoryn ornatty. Joǵary tehnologıaly ota mindetti áleýmettik medısınalyq saqtandyrý esebinen jasaldy, dep habarlaıdy Almaty-akshamy.kz
OQKA baspasóz qyzmetiniń dereginshe, biregeı operasıa omyrtqany emdegennen keıin mazalaıtyn aýyrsyný sezimin joıýǵa kómektesedi.
Jyldar boıy bel aýrýynyń zardabyn tartqan áıel aıaǵyn basa almaı qalatyn. Buǵan deıin mamandar onyń bel aýrýyna sebep bolǵan omyrtqadaǵy jaryqty alyp tastasa da aýyrsyný sezimi basyla qoımapty. Tipti dári-dármekter de kómektespegen kórinedi.
Operasıany OQKA dárigeri Marat Almatov reseılik neırohırýrg, Novosıbırsk qalasyndaǵy Federaldy neırohırýrgıa ortalyǵynyń bólimshe meńgerýshisi Aleksandr Dmıtrıevpen birlesip jasady.
Ota barysynda naýqastyń omyrtqasyna aýyrýdy basatyn turaqty elektrodtar ornatty. Elektrodtar júıke talshyqtaryna ımpúls berip, aýyrsyný sezimin basyp otyrady. Sonymen qatar, bul ádis bas, arqa men aıaqtyń aýyrǵanyn basady deıdi mamandar.
«Basynda biz elektrmen stımýlásıalaý qanshalyqty nátıje beretinin kórý maqsatynda elektrodty omyrtqa kanalyna ornattyq. Arnaıy púlt pasıentke qurylǵyny iske qosyp, ımpúlstiń amplıtýdasyn retteýge múmkindik beredi. Naýqasqa kómegi tıgenine kóz jetkizgen soń teriniń astyna turaqty generator ornattyq. Endi pasıent apparatty qajet kezde qosyp, aýyrýy basylǵan soń óshirip tastasa bolady»,- deıdi Marat Almatov.
Qazir jaǵdaıy jaqsaryp, aýyrsyný seziminen arylǵan áıeldiń dárigerlerge aıtar alǵysy sheksiz.
«Arqamnyń aýyrǵanyna kóp jyldar boldy. Toqtamastan aýyrǵan kezde janym kózime kórinetin. Kún saıyn ishetin kúshti preparattardan da nátıje bolmady. Uıqym tynysh, janym jaı tapty. Dárigerlerge alǵystan basqa aıtarym joq. Altyn qoldy mamandar aldaǵy ýaqytta osy ádispen qanshama adamnyń janyna arasha túsip, aýrýyn jeńildetetinin oılasam qýanamyn», - deıdi ol kózine jas alyp.
MSQ Almaty qalalyq fılıaly dırektory Tileýhan Ábildaevtyń sózine súıensek, endi bul qyzmet Ortalyq qalalyq klınıkalyq aýrýhanada MÁMS esebinen kórsetile bastamaq.
«Bul operasıany medısına salasyndaǵy sony jetistikterdiń biri deýge bolady. Ol omyrtqasy aýyratyn talaı pasıenttiń aýyrýyn jeńildeteri anyq. Joǵary tehnologıalardyń kómegimen jasalatyn mundaı qyzmetterdiń baǵasy qymbat bolsa. Degenmen operasıany MÁMS qarajaty esebinen jasatýǵa ábden bolady», - dedi Tileýhan Ábildaev.