9 jastaǵy balanyń derti kóziniń qaraýytyp, basy aınalyp qulap qalǵannan keıin bastalǵan. Anasynyń aıtýynsha, tirkelgen emhanadaǵy ýchaskelik dáriger ony birden neırohırýrgke jibergen. Alaıda kóp uzamaı balanyń jaǵdaıy kúrt nasharlap, álsizdik, júrek aıný jáne qusý sıaqty belgiler paıda bola bastaǵan, dep habarlady №2 Qalalyq klınıkalyq balalar aýrýhanasynyń (QKBA) baspasóz qyzmeti.
Aýrýhananyń konsýltatıvtik-dıagnostıkalyq ortalyǵynyń dárigerleri naýqastyń basyna kompúterlik tomografıa jasap, kólemdi isikti anyqtady. Neırohırýrgter shuǵyl túrde ota jasaý úshin ony neırohırýrgıa bólimshesine jatqyzý týraly sheshim qabyldady.
Shuǵyl shaqyrylǵan konsılıým nátıjesinde balaǵa tómendegideı kúrdeli dıagnozdar qoıyldy: mı dińinde kólemdi isik, qan quıylý, qaıtalama ishki gıdrosefalıa, býlbar sındromy, ataksıa jáne sol jaq gemıparezi.
Qazaq ulttyq onkologıa jáne radıologıa ǵylymı-zertteý ınstıtýtynyń mamandary jasandy tynystaý apparatyna qosylǵan, es-tússiz jatqan balanyń aýyr jaǵdaıyn eskere otyryp, hımıalyq nemese sáýleli terapıa tıimdi nátıje bere almaıtynyn málimdedi. Onyń ústine, hımıa terapıa álsiz aǵzany odan ári álsiretýi múmkin edi.
Alaıda №2 QKBA mamandary qol qýsyryp qarap otyrmaı, otany bastaýǵa bel býdy.
«Naýqastyń aýyr halin, mıdyń dińi zaqymdanǵanyn eskere otyryp, isikti ıntraoperasıalyq neıromonıtorıng pen neıronavıgasıany paıdalanyp, mıkrohırýrgıalyq tásilmen alyp tastaý týraly kúrdeli sheshim qabyldandy. Otanyń maqsaty – býlbar sındromyn basyp, mıǵa túsip turǵan qysymdy tómendetý. Asqan dáldikti talap etetin bul kúrdeli operasıa MÁMS esebinen jasaldy», – dedi №2 QKBA bas dárigeri Marat Rabandıarov.
Neırohırýrgıa bólimshesiniń meńgerýshisi Danıar Sábdenalıevtiń aıtýynsha, 4,5 saǵatqa sozylǵan ota sátti aıaqtaldy. Operasıaǵa neırohırýrg A.Jaılǵanov, anestezıolog A.Seıtkárim, asıstent R.Tansarova jáne medbıke B.Shagenova qatysty.
«Operasıadan keıingi kezeń qalypty jaǵdaıda ótti. Komada jatqan bala esin jıa bastady. Ekinshi kúni ol jasandy tynystaý apparatynan ajyratylyp, óz betinshe dem ala bastady. Jaǵdaıy turaqtanyp, jaqsarǵan soń, naýqas aýrýhanadan shyǵaryldy. Ári qaraı ol Pedıatrıa jáne balalar hırýrgıasy ulttyq ortalyǵynda josparly túrde hımıa terapıa qabyldaıdy», – dep túsindirdi ol.
Balalar neırohırýrgi Marat Rabandıarov bastaǵan 20-dan astam dáriger balanyń ómirin saqtap qalý úshin baryn saldy. Bilikti mamandar kúrdeli otany zergerlik dáldikpen oryndap, mı isiginen zardap shekken balanyń densaýlyǵyn turaqtandyrdy.
Es-tússiz jatqan, júrek qaǵysy buzylǵan jáne óz betinshe tynystaı almaǵan balanyń jaǵdaıyn turaqtandyryp qana qoımaı, operasıadan keıin qalpyna kelýine de zor úles qosty.