Almatylyq muǵalim Ulan Úsenov tyń ıdeıasymen áleýmettik jelide tanymal.
Jańashyl ustaz hımıa pánin qyzyqty ári qarapaıym formatta oqytady. Ánmen súıemeldengen sabaqtary TMD boıynsha mıllıondaǵan kórermenniń yqylasyna bólengen. Hımıa pániniń muǵalimi Ulan Úsenov onlaın sabaq beredi, dep habarlaıdy Almaty-akshamy.kz 24.kz-ke silteme jasap.
TikTok jelisinde bilim berý kontentin júrgizý týraly oı 2020 jylǵy pandemıa kezinde kelgen. Jeke paraqsha ashyp, mektep baǵdarlamasyn japondyq anıme formatynda oqyta bastaǵan. Al Mendeleev kestesindegi elementterdi oqýshylarǵa tanymal ánder arqyly túsindiredi eken.
«Brom elementi Andreı Gýbınniń «Tún» áni arqyly tanymal bolyp, 8 mıllıonnan asa adam kórdi. Rolık astyndaǵy pikirde oqyrmandar bromdy talqylap, elementtiń qurylymyn eske túsirdi. Oqýshylar bir-birimen jarysyp, osy element týraly bilimderin tereńdetti. Osylaısha, hımıaǵa qyzyǵýshylyqtary arta tústi», - deıdi hımıa pániniń muǵalimi Ulan Úsenov.
Jas ustaz ár hımıalyq element týraly mátindi ózi jazyp, ánin oryndap, júktep otyrady. Búginge deıin ol 21 element týraly rolık túsirgen, qalǵandary daıyndalyp jatyr. Jalpy sany 118 beınebaıan júktemek. Ulannyń jańalyǵyn ózge muǵalimder sabaq barysynda paıdalana bastaǵan. Ulan Úsenov, hımıa pániniń muǵalimi: -
«Ár elementke laıyqty jańa án tabý kerek. Sonda ǵana oqýshylar ońaı este saqtaıdy. Qyzyqty aqparat, paıdalaný maqsaty, qalaı óndiriletini syndy faktiler mańyzdy ról atqarady. Ózge memleketterdegi muǵalimder habarlasyp, meniń rolıkterimdi sabaqta paıdalanyp júrgenin de aıtty», - deıdi hımıa pániniń muǵalimi Ulan Úsenov.
Ulan Úsenovtyń mıllıonnan astam oqyrmany bar. Olardyń kóbi – oqýshylar men muǵalimder. Olar ár elementti mınýttyq rolık arqyly jyldam jattap, baǵdarlamany jeńildetip jatyr. Oqytýshynyń maqsaty – ózge áriptesterin áleýmettik jelige úıretip, oqýshylar qyzyǵatyn onlaın álemdi baǵyndyrý.