Bıyl almatylyqtardyń densaýlyǵyn saqtaýǵa 334,2 mlrd teńge bólindi. Onyń 158,5 mlrd teńgesi mindetti áleýmettik medısınalyq saqtandyrý paketine, qalǵan 175,7 mlrd teńgesi kepildendirilgen tegin kómek paketine tıisili. Bul týraly Medısınalyq saqtandyrý qorynyń Almaty qalalyq fılıaly habarlady.
Habarlamaǵa súıensek, bıyl Almaty qalasy boıynsha halyqqa medsaqtandyrý jáne kepildendirilgen tegin kómek sheńberinde 212 medısına uıymy kómek kórsetpek. Qormen kelisimshart bekitken klınıkalardyń 132-si — jeke menshik. Bıyl Qormen jumys isteıtin almatylyq klınıkalar qatary emhana jáne stomatologıa qyzmetterin kórsetetin 6 jańa klınıkamen tolyǵyp otyr.
Medısınalyq mekemeler tizimimen Qordyń fms.kz saıty arqyly tanysýǵa bolady.
Saqtandyrý júıesi tolyqqandy engizilgen 5 jyl ishinde memlekettik uıymdarmen qatar jeke klınıkalar kórsetetin qyzmet spektri de aıtarlyqtaı artty. Búginde Qormen jumys isteıtin bıznes nysandary jalpy praktıka dárigerilerimen, salalyq mamandarmen jabdyqtalǵan, gemodıalız, ekstrakorporaldy uryqtandyrý, medısınalyq ońaltý, pozıtrondy-emıssıondyq tomografıa, magnıtti-rezonanstyq jáne kompúterlik tomografıa syndy taǵy da basqa qyzmetter kórsetedi.