Opera qalyń kórermenge 15 jeltoqsanda jol tartady.
Abaı atyndaǵy Qazaq ulttyq opera jáne balet teatrynda Dj. Verdıdiń «Aıda» operasynyń jabyq kórsetilimi ótti, dep habarlaıdy Almaty-akshamy.kz
«Aıda» operasy - álemdik operada ózindik oıyp alar orny bar, teatrsúıer qaýymnyń arasynda eń tanymal týyndylardyń biri. «Aıda» - mahabbattyń uly kúshin baıandaıtyn psıhologıalyq mýzykalyq drama. Abaı atyndaǵy QazUOBT-da bul qoıylymnyń qoıylmaǵanyna bes jyl tolypty. Qazir qoıýshy-rejısser Láılim Imaǵazına men qoıýshy-sýretshi Vácheslav Okýnev bastaǵan shyǵarmashylyq top sahnada bizdiń dáýirimizge deıingi eki myń jyl burynǵy Mysyr perǵaýyndary men jaýyngerleriniń álemin qaıta jandandyrdy.
Qoıylym týraly búgin Láılim Imanǵazına, Vácheslav Okýnev, Abaı atyndaǵy QazUPÝ dırektorynyń mindetin atqarýshy Taıyr Qarataev, sýretshi-beınograf Vıktorıa Zlotnıkova men arnaıy shaqyrylǵan solıs Ahmet Agadı aıtyp berdi.
«Mysyrlyq mıfologıa jyldan-jylǵa túrli teorıalar men boljamdarmen tolyqtyryla túsýde. Ejelgi órkenıettiń asqaq jetistikteri syrttan kelgen kúshtermen, ózge ǵalamshar yqpalymen jasaldy degen de oılar bar. Sondyqtan bizge spektáklmen jumys jasaý kezinde eki órkenıettiń - Ejelgi Mysyr men fantasıkalyq álemniń toǵysý stılısıkasyn paıdalaný qyzyqty bolyp kórindi. Biz ejelgi artefaktilerdiń fragmentteri men tehnogendik álemniń dızaınynan ózinshe pazl oılap taptyq... Qalaı shyqqanyn kórermen baǵalar», - dedi qoıýshy-sýretshi Vácheslav Okýnev.
Djýzeppe Verdıdiń ólmes týyndysy álemniń barlyq jetekshi opera teatrlarynyń repertýarynan tabylady. Mysyr áskerı qolbasshysy Radames, tutqynǵa túsken efıopıalyq hanshaıym Aıda men perǵaýyn qyzy Amnerıs mahabbat pen bostandyq, mahabbat pen kek, al sońynda – mahabbat pen ómir arasynan aýyr tańdaý jasaýǵa tıis edi. «Aıda» operasynyń basty ereksheligi de osynda – qabirlerdiń birindegi qazba jumystary barysynda tabylǵan ejelgi papırýstan alynǵan oqıǵanyń shynaıy sújeti negizge alynǵan.
«Álem ýaqyttan qorqady, al ýaqyt pıramıdalardan qorqady. «Aıda» - ǵasyrlar kóshinde barlyq ýaqyt pen halyqtar úshin jazylǵan opera. Keıipkerleri sezim men paryzdyń arasynda tańdaý jasaıtyn mahabbat tarıhy Ejelgi Mysyrdyń qupıalary men syrlaryna toly. Verdıdiń uly mýzykasy juldyzdarǵa, ǵarysh keńistiginiń sheksizdigine jeteleıdi», - dedi óz kezeginde Láılim Imanǵazına.