Kásipkerlerge taýar belgilerin tirkeý ne úshin qajet, tirkeýdiń óndirýshiler men paıdalanýshylarǵa qandaı paıdasy bar, osy jáne basqa da suraqtarǵa Óńirlik komýnıkasıalar qyzmetiniń alańynda ótken brıfıń barysynda Almaty qalasy Ádilet departamentiniń ókilderi jaýap berdi, dep habarlaıdy Almaty-akshamy.kz.
«Zıatkerlik menshikti qorǵaýdyń mańyzdy aspektileriniń biri – taýar belgilerin qorǵaý. Taýar belgilerin tirkeý jáne qorǵaý zańnamaǵa jáne halyqaralyq kelisimderge sáıkes júzege asyrylady. Aýmaqtyq ádilet organdary tirkelgen taýar belgilerin zańsyz paıdalanýdyń jolyn kesýde jáne quqyq ıeleriniń quqyqtary men múddelerin qorǵaýda mańyzdy ról atqarady. Saýda belgileri tutynýshylar úshin úlken mańyzǵa ıe, óıtkeni olar taýarlardy tańdaýda nusqaýlyq retinde qyzmet etedi jáne belgili bir sapa men senimdilikpen baılanysty. Olar sondaı-aq óndirýshilerge óz taýarlaryn naryqta tanýǵa jáne marketıńtik strategıalardy qurýǵa kómektesedi», - dedi Almaty qalasy Ádilet departamentiniń zıatkerlik menshik quqyǵy bóliminiń basshysy Erkebulan Jetpisbaev.
Spıker qazirgi ýaqytta taýar belgileriniń fýnksıalary kontrafaktilik ónimderdiń taralýyna jáne basqa adamdardyń belgilerdi teris paıdalanýyna baılanysty jıi buzylatynyn aıtyp, tolyqtyrdy. Bul ekonomıka men tutynýshylarǵa teris áser etedi.
«Taýar belgilerin quqyqtyq qorǵaý tek óndirýshiler úshin ǵana emes, sonymen qatar tutynýshylardyń múddelerin qorǵaý úshin de mańyzdy. Ol beıindik zańdarmen jáne halyqaralyq sharttarmen retteledi. Ádilet organdary zańnamaǵa sáıkes taýar belgileriniń paıdalanylýyn memlekettik baqylaý fýnksıalaryn oryndaıdy jáne olardyń zańdy paıdalanylýyn qamtamasyz etý úshin tekserýler júrgizedi. Almaty qalasynyń Ádilet departamenti jeke jáne zańdy tulǵalardyń taýar tańbalaryn jáne basqa da zıatkerlik menshik obektilerin paıdalaný erejeleriniń saqtalýyna tekserýlerdi belsendi júzege asyrady», - dep bólisti Almaty qalasy Ádilet departamentiniń baspasóz hatshysy Almas Bekbotaev.
Osy saladaǵy quqyq buzýshylyqtarǵa keletin bolsaq, jyl basynan beri Departamentpen 5 mln teńgeden astam somaǵa 6 788 myń kontrafaktilik ónimdi alyp qoıý boıynsha 16 ákimshilik is qozǵaldy. Onyń ishinde jalpy somasy 4,5 mln teńgeden asatyn 5 862 birligi tárkilendi. Salynǵan aıyppuldar somasy 900 myń teńgeni qurady.
Memlekettik kirister departamenti jáne quqyq ıelenýshimen birlesip taýarlardy Qazaqstan Respýblıkasynyń aýmaǵyna zańsyz ákelýge jol berilmedi. Mysaly, quqyq ıeleriniń kelisiminsiz jalpy salmaǵy 5,5 tonna bolatyn kir jýǵysh untaqtyń 1640 qaptamasyn jáne 600 dana qyryný stanoktaryn ákelý toqtatyldy.
«Departamenttiń kúsh-jigeri quqyq ıelenýshilerdiń múddelerin qorǵaýǵa jáne kásipkerlerdi qoldaýǵa baǵyttalǵan. Maqsaty quqyq ıelenýshilerdiń quqyqtary men zańdy múddeleriniń saqtalýyn qamtamasyz etý, tutynýshylardy kontrafaktiden qorǵaý jáne naryqta adal básekelestikti qoldaý», - dep atap ótti spıker.
Taýar belgisin tirkeý úshin Avtorlyq quqyq ıesi Ulttyq zıatkerlik menshik ınstıtýtyna qazpatent.kz. resmı saıty arqyly júginýi kerek. Taýar tańbasyn tirkeý prosesi 7 aıǵa deıin sozylýy múmkin. Proses burynnan bar saýda belgilerine uqsastyqty taldaýdy jáne jalpy qabyldanǵan erejeler men normalardy tekserýdi qamtıdy. Aıta ketý kerek, taýar tańbasyn qorǵaý ol tirkelgen aýmaqta ǵana qoldanylady.