Jedel járdem brıgadasy Almaty qalalyq Jedel shuǵyl kómek kórsetý aýrýhanasynyń qabyldaý bólimine aýyr jaǵdaıda 43 jastaǵy áıeldi jetkizdi.
Qabyldaý bóliminde naýqasty kópbeıindi top qarady.
Aýrýhanaǵa túsken kezde áıeldiń jatyry 13-14 aptalyq júktilikke sáıkes ulǵaıǵany anyqtalǵan (11-12 aptalyq júktilikke sáıkes ulǵaıý – úlken isik bolyp sanalady). Qan ketip, aýyr anemıaǵa ushyraǵan (gemoglobın – 22 g/l), naýqastyń jalpy jaǵdaıy aýyr bolǵan. Pasıent dereý anestezıologıa, reanımasıa jáne qarqyndy terapıa bólimshesine jatqyzylǵan. Negizi naýqasqa 2022 jyly «jatyr mıomasy» dıagnozy qoıylǵan eken.
– Pasıentte gemoglobın deńgeıi 22 g/l, ıaǵnı óte tómen boldy. Jatyr mıomasy bar naýqastarda gemoglobın deńgeıiniń túsýiniń negizgi jáne aıqyn sebebi – zaqymdalǵan organnan patologıalyq qan ketý. Sondyqtan mıomamen aýyratyn naýqastarda patogenetıkalyq temirtapshylyǵy bar anemıanyń emi – qan ketý kózin, ıaǵnı jatyrdy hırýrgıalyq jolmen alyp tastaý, – dep túsindiredi atalǵan aýrýhananyń gınekologıa bólimshesiniń meńgerýshisi Alma Beksultanova.
Osylaısha A.Beksultanova jáne dáriger-gınekolog B.Qaldybaı Pfannenshtıl boıynsha laparotomıa, sol jaq qosalqylarymen jatyrdyń ekstırpasıasy otasyn jasady. Operasıa 2 saǵatqa sozyldy.
Otadan keıingi kezeń asqynýsyz ótti. Áıel ózin jaqsy sezinip, aýrýhanadan úıine shyǵaryldy.
– Bizdiń tájirıbemizde úlken kólemdegi mıoma jıi kezdesedi. Mundaı túzilimder búırektiń qalypty jumysyna kedergi keltirýi, juqpaly jáne qabyný aýrýlarynyń damýyna yqpal etýi múmkin. Asqorytý júıesiniń jumysy da buzylýy múmkin. Sonymen qatar, olar onkologıalyq qaýip tóndiredi. Barlyq áıelge patologıa men aýrý bolmaǵannyń ózinde kem degende jylyna bir ret gınekolog mamanǵa kóriný kerek ekenin eske salǵym keledi. Qaıtalap aıtamyn, gınekologqa únemi qaralyp, ýaqytynda tekserýden ótý mańyzdy. Óıtkeni áıel adam shydamdy keledi, kóp aýrý týraly bilmeýi jáne eshqandaı belgini sezbeýi de múmkin. Al eger sizde qandaı da bir gınekologıalyq aýrý bolsa, onda mindetti túrde dáriger usynǵan júıelilikpen tekserilip turý kerek. Al eger maman ota jasaýdy talap etse, sozbaı ýaqytynda jasatýǵa mán bergen jón, – deıdi Alma Beksultanova.