Megapolıs tórindegi irgeli A.P.Chehov atyndaǵy Ortalyq qalalyq kitaphanada "Jumysshy mamandyǵy – meniń tańdaýym" taqyrybymen tanymdyq kezdesý ótti, dep habarlaıdy Aqshamnews.kz.
Rýhanı ráýishte kórinis tapqan júzdesý keshine óz ortasynda abyroıǵa bólenip, túrli salada júrgen eńbek adamdary, dálirek aıtsaq, slesar, sanıtar, troleıbýs júrgizýshisi jáne órt sóndirýshi maman qatysty. Olar jastarǵa úlgi, ónege bolarlyq eńbek jolynan syr shertti.
"Almaty Sý" MKK-niń Túrksib aýdany boıynsha bólimshesiniń slesary, "Eren eńbegi úshin" medaliniń ıegeri Dóńesbaı AHANAEV:
"Jıyrma segiz jyl boldy osy bir salada eńbek etip júrgenime. Bıyl úlken marapat aldym. Bizdiń de eńbegimiz elenedi eken-aý dep qýanǵanym ras. Tótenshe jaǵdaılar bola qalsa, tańnan keshke deıin jeldiń ótinde, jańbyrdyń astynda, aq qar-kók muzda kúı, bap talǵamaı júre beremiz ǵoı. Maqsatymyz – Almaty syndy alyp megapolıstiń turǵyndaryn sapaly sýmen qamtamasyz etý. Balalarym, nemerelerim bar. Urpaǵyma jumystyń jamany joq, kez kelgen eńbek qadirli, kez kelgen eńbekker qurmetti ekenin aıtyp otyramyn. Ózim sý mamany bolǵasyn, "sýdyń da suraýy bar" ekenin, ony da únemdeı bilgen abzal bolatynyn eske salýdan jalyqpaımyn. Bir ókinishtisi – bizge jas mamandar kelýge yntaly emes. Qazir kásiptik bilim alýǵa jol ashyq, kedergi joq. Almatyda kolej kóp, oqımyn degen balaǵa oqý tegin. Jastar osy máseleni de eskerse deımin"- dedi ol.
Iá, eńbek adamyn ulyqtaý maqsatynda uıymdastyrylǵan is-sharaǵa jastar kóp jınaldy. Bizdi qýantqany sol. Memleket basshysy 2025 jyldy "Jumysshy mamandyqtarynyń jyly" dep jarıalaǵany málim.
№9 troleıbýs júrgizýshisi, "Eren eńbegi úshin" medaliniń ıegeri Maqpal QOJAMSEIİTOVA:
"Troleıbýs tizgindep júrgenime on úsh jyl boldy. Joldasymmen osy salada júrgende tanysqanmyn. Qazir eki qyzymyz bar. Jumysym ózime unaıdy. Qyzyǵy kóp, shyjyǵy da joq emes. Qyzyǵy sol, kúnde bir baǵytpen júrip júrgen soń, kóp jolaýshyny sonadaıdan tanyp otyrasyz, tipti, týysyńyz sekildi sizben jyly amandasady. Hal-jaǵdaı surasamyz. Segizinshi naýryzda shokolad usynyp, kóńilimdi kóterip tastaıdy. Aıaldamasynan túsip bara jatyp, "sharshamaı jaqsy jettim, rahmet, qyzym!" dep dorbasyndaǵy alma, almurtyn usynatyn apalar qandaı! Másele bergende emes, kúndelikti troleıbýsqa otyratyn jolaýshylardyń ózińe degen yqylasyna marqaıyp qalamyn. Al shyjyǵy deıtinim, keı jastar úlkenderge oryn bermeı, salon ishi shý bolyp ketip jatady. Keıde úıinen kóńilsiz shyqqandar aınalasyna, saǵan da tıisip ótetini bar, bireýi jeldetkishińdi qos dese, ekinshisi óshir, aýyryp otyrmyn deıdi. Ondaı sátterde sabyr saqtaýǵa, daýys kótermeýge, eshkimmen renjispeýge tyrysamyn. Sebebi troleıbýs tizgininde otyrǵan meniń moınymda kóliktegi jáne jol boıyndaǵy júzdegen adamnyń jaýapkershiligi, amandyǵy turady"- dedi.
"Jumysshy mamandyqtarynyń jyly" – bul qoǵamnyń basty tiregi sanalatyn eńbek adamyna, olardyń qajyrly eńbegine nazar aýdaryp, jumysshy mamandyqtaryn dáripteý.
Respýblıkalyq Kardıologıa jáne ishki aýrýlar ǴZI-nyń klınıngtik qyzmet bóliminiń sanıtary Aınagúl SISENOVA:
"Biz irgeli medısınalyq mekemeniń tazalyǵyna jaýaptymyz. Men jumysymdy jaqsy kóremin. Tazalyq ústemdik qurǵan jerde tártip te, jaılylyq ta bolady. Jansaqtaý bóliminde de jumys istegenim bar. Onda adamdarǵa kútim jasaımyz. Jany qınalǵan túrli naýqaspen, túrli taǵdyrmen betpe-bet kelesiz. Otaǵa alyp bara jatqanda jaqsy tilek aıtyp qalamyz. Ýaqyt uzap bara jatsa, alańdap jolyn kútemiz. Ortamyzǵa oralǵanda balasha qýanamyz. Olardy sózben demep jiberý úshin de adamǵa úlken júrek, bıik adamgershilik sezimi kerek dep oılaımyn. Jalpy, jumysyńyzdy rıasyz jaqsy kórseńiz, adamdardy, aınalany jaqsy kórseńiz, sizde bári jaqsy degen sóz. Jastarǵa aıtarym, kishkentaı ǵana dúnıeden de jaqsylyq kórip turýǵa umtylý kerek. Al jaqsylyq jaqsylyqty shaqyryp turady"- dedi maman.
Aıtýly jyldyń maqsaty da sol, jas urpaqtyń eńbek adamyna degen qurmetin arttyrý, jastardy kásibı tehnıkalyq bilim alýǵa yntalandyrý, jumysshy mamandyqtaryn jatsynbaýǵa shaqyrý.
№12 Órt sóndirý bóliminiń aǵa órt sóndirý qutqarýshysy, "Azamattyq qorǵaý" serjanty Dáýren SHERİKBAI:
"Bala kúnimde adamdarǵa kómek kórsetýge, jan-janýarlarǵa da qamqor bolýǵa qushtar edim. Mine, búginde órt sóndirýshi, qutqarýshy qyzmetinde abyroıly eńbek etip júrmin. Úsh jyldaı ǵana bolsa da, bul salanyń qyr-syryna tereń boılap kelemin. Órt sóndirýshige birinshi kezekte jyldamdyq, eptilik, júrektilik kerek. Bizge, mysaly, tótenshe jaǵdaı týraly dabyl túsetin bolsa, on toǵyz-jıyrma alty sekýnd arasynda qorǵanys kıimderin kıip úlgerýińiz kerek. Sebebi tilsiz jaý sekýndtardan da jyldam bolady. Aptap ystyqta da ústińizdegi qalyń kıimmen ottyń ishine qoıyp ketetin sátterimiz de kóp. Ár sát mańyzdy. Tipti, alyp bazar órtke oranyp jatsa, adamdarmen birge olardyń kúnkórisine aınalǵan múlkin de aman alyp qalýǵa jantalasamyz. Jalpy, biz 102-ge qandaı habar túsedi, mysaly, bala ishte kilttenip nemese mysyq temir trýbaǵa keptelip qalýy múmkin, sol oqıǵalardy úlken-kishi demeı bárinde teń júremiz. İzgilikti murat etken qoǵamda bizdiń qyzmetimiz de asa mańyzdy dep bilemin" dedi ol.
Keshti qorytyndylaǵan A.P.Chehov atyndaǵy Ortalyq qalalyq kitaphananyń meńgerýshisi Aınur Balaýbaeva eńbek adamdarynyń ár qadamy kópke, ásirese jastarǵa úlgi ekenin aıta kele, jumysshy mamandyqtarynyń mártebesin kóterýge shaqyrdy.
Al otandyq sahna juldyzdary – Jubanysh Jeksenuly men Beıbitgúl Nurymǵojına jany izgi meımandarǵa ánnen shashý shashty.
