Uly Otan soǵysynyń maıdangeri Shınkarev Ivan Afanasevıch búkil soǵysty bastan ótkerdi, 17 jasynda áskerge shaqyryldy, pýlemetshi boldy, Baltyq elderinde soǵysyp, úsh ret jaraqat alyp, elge oraldy.
Ivan Afanasevıch 98 jasqa tolar aldynda ınsýlt alyp, bas mıynyń trombozynan týyndaǵan serebraldy ınfarkt dıagnozymen Almaty №4 qalalyq klınıkalyq aýrýhanasynyń nevrologıalyq bólimshesine shuǵyl túrde jatqyzyldy, dep habarlaıdy Almaty-akshamy.kz.
«Tańǵy as kezinde qolynan kesesin túsirip alǵanda, ardagerdiń nemereleri onyń jaǵdaıynyń nasharlaǵanyn túsindi, sodan keıin ol sóıleı almady. Jaqyndary ony shuǵyl túrde №4 qalalyq klınıkalyq aýrýhananyń nevrologıalyq qabyldaý bólimine jetkizdi. Munda ony nevropatolog, terapevt jáne reanımatolog mamandar birlesip tekserdi. Qabyldaý bóliminde biz bas mı tomografıasyn jasap, naýqasty mamandandyrylǵan bólimshege jatqyzýdy uıǵardyq. Onyń túsken kezdegi jalpy jaǵdaıy júrek jáne serebraldy jetkiliksizdikke baılanysty aýyr dep baǵalandy», - deıdi nevrologıa bólimshesiniń meńgerýshisi Dınara Muhanǵalıeva.
Dárigerler konservatıvti emdeý týraly sheshim qabyldady, óıtkeni naýqasta kóptegen qatar júretin sozylmaly patologıa boldy jáne kez kelgen hırýrgıalyq aralasýdyń ardager úshin qaýpi joǵary boldy. Kún saıyn mamandar maıdangerdiń densaýlyq jaǵdaıy men negizgi kórsetkishterine klınıkalyq, zerthanalyq jáne aspaptyq zertteýler júrgizdi. Naýqasty kúndelikti terapevt, nevropatolog jáne kardıolog dárigerler qarap turdy.
Tórtinshi qalalyq aýrýhananyń emdeýshi dárigeri, nevropatolog Jáńgir Ábdıev atap ótkendeı, EKG, bas mıǵa KT, ehokardıografıa, aıaq-qol tamyrlaryna ÝDZ, keýde qýysy múshelerine KT kórsetkishteri únemi baqylaýda boldy.
Emdeý nátıjesinde Ivan Afanasevıchtiń jaǵdaıy turaqtalyp, saýyǵa bastady, al 10 kúnnen keıin 98 jasqa tolǵan kúni ardager aýrýhanadan shyǵaryldy.
«Biz tamaqta as tuzyn shekteýdi usyndyq - bul ınsýlt pen ınfarkt qaýpin 19-20%-ǵa tómendetedi. Kalıı men magnııge baı jemis pen kókónisti kóbirek jeýdi usyndyq. Taǵamǵa teńiz ónimderin engizgen durys. Janýar maılaryn tutynýdy azaıtqan jón. Naýqas qan qysymyn, qandaǵy qantty únemi baqylaýdy qajet etedi jáne ýchaskelik dáriger usynǵan dári-dármekti kúndelikti qabyldaýdy umytpaýy kerek. Jeke tańdalǵan dári-dármekti únemi qoldaný ınsýlt qaýpin taǵy 40%-ǵa tómendetedi», - dep atap ótti emdeýshi dáriger, №4 qalalyq klınıkalyq aýrýhananyń nevropatology, Jáńgir Ábdıev.
Ivan Afanasevıchti úıde úlken otbasy - 2 balasy, 4 nemeresi jáne 8 shóberesi kútedi.