Megapolıstegi №7 qalalyq aýrýhananyń hırýrg-dárigerleri trombosıtopenıasy (qan uıýynyń buzylýy) bar pasıentke asa kúrdeli otany sátti jasap shyqty. Dálirek aıtsaq, qan ketýdiń joǵarylaýymen sıpattalatyn aýtoımmýndy keseli bar («Verlgof aýrýy») 33 jastaǵy naýqasqa jasalǵan aýyr operasıa sátimen aıaqtaldy. Bul týraly aýrýhananyń baspasóz qyzmeti habarlady.
№7 QKA gematologıa bólimshesiniń meńgerýshisi Gúljan Sabyrbaevanyń aıtýynsha, ıdıopatıalyq trombosıtopenıkalyq pýrpýra – qaıtalap soǵatyn aýrýdyń aýyr túri. Aýrý teri astyndaǵy qan quıylý, muryn jáne qyzylıekten qan ketý túrinde jıi qaıtalanyp turatyn kesel. Bul dert adamdy jumysqa qabiletsiz etip, tipti ólimge ákelýi múmkin.
«Aýrý qandaǵy trombosıtterdiń (trombosıtopenıa) sanynyń tómendigimen sıpattalady (trombosıtopenıa), bul ózdiginen qan ketýdi týdyrady. Konservatıvti terapıa oń nátıje bergen joq. Mundaı jaǵdaılarda aýrýdyń rezıstentti túri týraly aıtady», – dep túsindirdi jaǵdaıdy gematolog-dáriger G.Sabyrbaeva.
Konservatıvti terapıaǵa tózimdilikti eskere otyryp, naýqasqa splenektomıa, ıaǵnı kókbaýyrdy alyp tastaý usynyldy. Operasıaǵa daıyndyqtan keıin pasıent radıkaldy hırýrgıalyq operasıaǵa alyndy.
«Operasıalyq emdeýdiń kúrdeliligi sonda, kez-kelgen sátte kóp mólsherde qan ketý qaýpi joǵary boldy, al ol mıdyń gıpoksıasyna jáne ólimge alyp kelýi múmkin. Ota sátti ótti, bári josparlaǵanymyzdaı boldy. Operasıadan keıin trombosıtterdiń deńgeıi qalpyna keldi, naýqastyń kóńil-kúıi men jalpy jaǵdaıy qanaǵattanarlyq», – dedi №2 hırýrgıa bólimshesiniń meńgerýshisi, profesor Musa Sahıpov.
Dárigerler ishke qan ketý qaýpi joq ekenine kóz jetkizgennen keıin pasıentti 5 táýlikke gematologtyń ambýlatorıalyq baqylaýyna shyǵardy.
Dárigerlerdiń joǵary kásibı sheberliginiń jáne olardyń asa zor kúsh-jigeriniń arqasynda taǵy bir adam ajal aýzynan qutqaryldy.