998 gram bolyp týǵan balanyń aǵzalary jetilmegen.
Almatyda dárigerler kómegimen salmaǵy 998 gr bolyp ómirge kelgen sábıdi aman qaldy, dep habarlaıdy Almaty-akshamy.kz.
Almaty qalalyq qoǵamdyq densaýlyq saqtaý basqarmasynan habarlaǵandaı, qalalyq Perınatologıa jáne balalar kardıohırýrgıasy ortalyǵynda salmaǵy 998 gram bolyp shala týǵan 7 aılyq náreste dúnıege kelgen.
Jańa týǵan náresteni tekserý kezinde dárigerler aǵzalarynyń jetilmegendigi, búırek jetkiliksizdiginiń aýyr túri, eki jaqty gıpoplazıa jáne búırek polıktozy dıagnozyn qoıady.
«Bul aýyr dárejedegi týa bitken búırektiń zaqymdanýy. Balanyń merziminen buryn 998 gram bolyp týyp, aǵzalarynyń jetilmegendiginiń ózi jaǵdaıdy kúrdelendirip turǵan, eki búırektiń zaqymdanýy jaǵdaıdy qıyndata tústi. Onyń aman qalýyna úmit az edi. Biz aǵzalardyń jetilmegendigin jeńe alsaq ta, búırekterde asqynýlar bolatynyn bildik. Solaı boldy da, bala reanımasıada 52 kún, keıin náresteler patologıasy bólimshesinde 2 aı jatty. Biz Asfendıarov kafedrasynan mamandardy shaqyrdyq, konsılıýmdar ótkizdik», - dedi Ortalyq dırektorynyń orynbasary, dáriger-neonatolog Elena Plýjnıkova.
Onyń aıtýynsha, aýrýdyń aýyrlyǵyna qaramastan, bala jaqsy damydy.
Birtindep júrgizilgen barlyq medısınalyq kómekten soń bala salmaq qosa bastady, sondaı-aq, qyz balada retınopatıa anyqtalǵandyqtan, onyń kózine operasıa jasaldy. Aýrýhanadan shyǵarý kezinde eki kelige deıin salmaq qosty.
«Sábı aýrýhanadan shyqqanda, densaýlyǵy ortasha-aýyr dárejede bolatyn. Ony birden nefrolog pen ýrolog esepke aldy. Búgingi tańda bala búırektiń jumysyn qamtamasyz etetin dári-dármekter qabyldaıdy. Keıin bala sál ósken soń, búırek transplantasıasy týraly sóz qozǵaýǵa bolady. Alty aıǵa deıin ony jasaýǵa bolmaıdy, sebebi, bala salmaq qosyp, myqty bola túsýi kerek. Keıin ata-anasy portalǵa ary qaraı emdelý úshin ótinish bere alady», - dedi Elena Plýjnıkova.