Aleksandra aýyr eki jaqty sýbtotaldy vırýstyq-bakterıalyq pnevmonıa dıagnozymen №4 qalalyq klınıkalyq aýrýhanada emdelip jatqanda tórtinshi balasyn dúnıege ákeldi.
«Júkti áıel bas aýrýy, qan qysymynyń joǵarylaýy, entigý, álsizdik shaǵymdarymen qabyldaý bólimine túsken. Onda eki jaqty sýbtotaldy pnevmonıa anyqtaldy. Terapevter konsýltasıaǵa gınekologtardy shaqyrdy. Naýqasta aýyr preeklampsıa dıagnozy, 26 apta júktilik merzimi anyqtaldy. Áıel dereý jansaqtaý bólimine jatqyzyldy, odan ári emdeý jáne tekserý qatań túrde jansaqtaý bóliminde júrgizildi, sonda klınıkalyq, zerthanalyq jáne aspaptyq tekserýler júrgizildi, birneshe jalpy qalalyq konsılıým ótkizildi», - deıdi Almaty №4 qalalyq klınıkalyq aýrýhana gınekolog dárigeri Anjela Ýmarkýlova.
Qalalyq konsılıým naýqasty aldaǵy 48 saǵat ishinde kesar tiligi arqyly bosandyrý týraly sheshim qabyldady. Mamandardyń aldynda naýqas pen onyń balasyn aman alyp qalý mindeti turdy.
Osy maqsatta №2 perınataldyq ortalyqtan akýsherlik-neonataldyq brıgada shaqyryldy. Kesar tiligi №4 qalalyq klınıkalyq aýrýhananyń otalyq bólimderiniń birinde jasaldy.
Salmaǵy 1 kg 400 g qyz bala dúnıege keldi, náresteni neonataldyq brıgada qabyldap, jańa týǵan nárestelerge arnalǵan arnaıy ınkýbatorda balany odan ári kútý úshin perınataldy ortalyqqa jetkizdi.
«Bosanǵan áıeldiń jaǵdaıy óte aýyr dep baǵalanyp, ol odan ári emdelý úshin №4 qalalyq klınıkalyq aýrýhanada qaldyryldy. Munda naýqas 12 kún boldy. Osy ýaqyt aralyǵynda krıtıkalyq kórinis birneshe ret qaıtalanyp, reanımatologtar barlyq asqynýdy túzetip, ony turaqty jaǵdaıǵa jetkizdi. Áıeldiń jaǵdaıy jaqsaryp, úıine shyǵaryldy», - dep atap ótti №4 qalalyq klınıkalyq aýrýhananyń gınekology Anjela Ýmarkýlova.
Kópbeıindi stasıonarda bosaný standartty jaǵdaıǵa jatpaıdy, sábı akýsherlik kómek erekshe uıymdastyrylǵan arnaıy jaǵdaıda dúnıege kelý kerek. Aleksandranyń aýyr halin, dıagnozdyń aýyrlyǵyn jáne ana men balanyń ómirine tóngen qaýipti eskergen dárigerler aýrýhanada kesar tiligin jasady.
Áıeldiń ómiri úshin №4 qalalyq klınıkalyq aýrýhananyń gınekologtary, reanımatologtary, terapevteri, hırýrgtary jáne kardıologtary kúresti.
«Aýyr akýsherlik anamnez. Sozylmaly anemıa. Aýrýhanadan tys eki jaqty sýbtotaldy aýyr vırýsty-bakterıalyq pnevmonıa. Tynys alý jetkiliksizdigi. Pnevmotoraks. Sozylmaly arterıalyq gıpertenzıa. Júrek jetkiliksizdigi. Dıffýzdy toksıkalyq alqym isýi. Gıpertıreoz. Dekompensasıa. Gestasıalyq qant dıabeti» - bul dárigerlerdi tik turǵyzǵan «tosynsyıdyń» tolyq jıyntyǵy emes.
Qazir Aleksandra men onyń sábıiniń ómiri men densaýlyǵyna esh qaýip joq. №2 qalalyq perınataldyq ortalyqtyń dárigerleri balany shyǵarýǵa daıyndap jatyr. Tolyq saýyǵyp ketken anasy perzenthanaǵa qyzyna barǵan.
«Qazir medısınany jalqaýlar ǵana synamaıdy. Al men meni jáne jańa týǵan qyzymdy aman alyp qalǵan Almaty dárigerlerine rahmet aıtyp, shyn júrekten alǵysymdy bildirgim keledi. Maǵan tórtinshi kesar tiligin eki tamasha dáriger – №2 qalalyq perınaldyq ortalyq dırektorynyń emdeý bólimi boıynsha orynbasary Kýrenova Gýlnara Baıbýsynovna jáne №4 qalalyq klınıkalyq aýrýhanaǵa jetekshilik etetin QRMÝ profesory Bodykov Ganı Jandıarovıch jasady. Meniń merziminen eki aı buryn shala týǵan, salmaǵy 1482 gram, qyzymdy №2 qalalyq perınataldyq ortalyǵynyń neonatology Sarbas Aınurym Álipbaıqyzy qabyldady, al meniń ómirim úshin №4 qalalyq klınıkalyq aýrýhananyń jansaqtaý bóliminde kúresti jalǵastyrǵan bólim meńgerýshisi Dáýletbekov Jandos Shymyrtaıuly men reanımasıa dárigeri Bolatov Qaırat Ádilbekuly boldy. Ózimdi jaqsy sezingen soń gınekologıa bólimshesiniń dárigeri Kevırova Zýhra Tlevaldıevnanyń baqylaýynda boldym. Eki bólek aýrýhananyń dárigerleriniń birlesken is-áreketi úlken uıymdastyrylǵan jumys. №4 qalalyq klınıkalyq aýrýhana ákimshiligine: dırektor Dosmaılov Birjan Serikbekulyna, onyń orynbasarlary Bıkonýrov Nurjan Omaruly men Raıymjanov Tımýr Tahırulyna erekshe alǵysymdy bildiremin.
Áleýmettik jeli zamanynda qatelesken dárigerlerdiń atyn atap, ár qateligin ashyp jazyp, abyroıyn túsirýden qoryqpaımyz! Biz qashan sońǵy ret dárigerdiń aýyr jumysyn baǵalap, oǵan jaı ǵana «rahmet» dep rızashylyǵymyzdy bildirdik?! Bizge jaqsylyq jasaǵandardyń aty-jónin bile bermeımiz, biraq men ádeıi ýaqyt taýyp, barlyq qutqarýshylarymnyń laýazymy men esimin bilip aldym - bul alǵystyń belgisi retinde meniń qolymnan keletin eń azy», - deıdi almatylyq Aleksandra Rozdına.