Sátti ótken operasıa jergilikti jansyzdandyrý arqyly eshbir tiliksiz jasaldy
Ortalyq qalalyq klınıkalyq aýrýhanada jyldar boıy gıpertonıanyń agressıvti túrinen zardap shekken 40 jastaǵy er adamǵa ota jasaldy. Operasıa mindetti áleýmettik medısınalyq saqtandyrý aıasynda iske asty. Bul týraly atalǵan aýrýhananyń baspasóz qyzmeti málimdedi, dep habarlaıdy Almaty-akshamy.kz.
Oral qalasynan kelgen naýqastyń joǵary qan qysymymen aýyrǵanyna kóp jyldar bolǵan. Kóp jaǵdaıda qan qysymy 220-ǵa deıin kóteriletin, sońǵy kezde dáriniń de kómegi tımeı qaldy, deıdi ol.
«Bul dertke shaldyqqanyma kóp jyl boldy. Qansha ýaqyttan beri dáriniń de túr-túrin ishtim, qan qysymy azdan keıin qaıta kóterilip ketetin. Bir jyl buryn mıkroınsýlt aldym. Em izdep tipti, Reseıge de bardym, biraq ol jaqtyń dárigerleri de tolyqqandy em jasaǵan joq. Osy aýrýhanada jaqsy mamandar bar degendi estip MÁMS boıynsha joldama alyp keldim», - dedi Batys Qazaqstan oblysynyń turǵyny.
Dárigerler angıografıa nátıjesinde oń jaq búırektegi arterıanyń moıny tarylǵanyn anyqtady.
Hırýrg Sultan Ilıev stenozǵa shaldyqqan búırektegi kúretamyrǵa stent ornatý týraly sheshim qabyldady. 20 mınýtta sátti ótken operasıa jergilikti jansyzdandyrý arqyly eshbir tiliksiz jasaldy.
«Pasıenttiń qan qysymy operasıa zalynda-aq 120/80-ge tústi. Búginde onyń jaǵdaıy jaqsy, dári ishpeıdi. Qazir úıge shyǵarýǵa daıyndap jatyrmyz», - dedi hırýrg.
Mamannyń aıtýynsha, uzaq ýaqyt arterıaldy gıpertenzıamen aýyratyn naýqastar búırektegi kúretamyrdy teksertkeni jón.