Ortalyq qalalyq klınıkalyq aýrýhanaǵa túsken 45 jastaǵy áıel beli men segizkózi qatty aýyratynyn aıtyp shaǵymdanǵan. Aıtýynsha, bel omyrtqasynyń aýyryp júrgenine 2 jyl bolypty, dep habarlaıdy Almaty-akshamy.kz OQKA baspasóz qyzmetine silteme jasap.
Dárigerler ony tezdetip aýrýhananyń neırohırýrgıa bólimshesine josparly túrde jatqyzý týraly sheshim qabyldady. Tekserý barysynda bel omyrtqanyń (L3) oń jaǵynda ekstradýraldy isik bary anyqtaldy.
«Ekstradýraldy isik julyn syrtyndaǵy qatty qabyqtan tysqary jerde paıda bolady. Keıde isiktiń bul túri omyrtqalardyń arasyndaǵy tesik arqyly da taralýy múmkin. Onyń taralý aýmaǵy men jyldamdyǵy isiktiń túrine baılanysty ártúrli bolady. Bul joly pasıenttiń omyrtqasyndaǵy isikti tez arada alyp tastaý qajet boldy», - deıdi neırohırýrgıa bólimshesi meńgerýshisi Marat Almatov.
Mamandar neıromonıtorıng ádisin paıdalana otyryp, isikti hırýrgıalyq últradybystyq aspıratordyń kómegimen kesip alyp tastady. Úsh saǵatqa sozylǵan ota mindetti áleýmettik medısınalyq saqtandyrý paketi sheńberinde jasaldy.
Operasıa sátti ótti, qazir pasıenttiń jaǵdaıy jaqsy, hırýrgıalyq manıpýlásıadan keıin júıke júıesinde eshqandaı aýytqýshylyq paıda bolǵan joq.
Dárigerlerdiń aıtýyna qaraǵanda, mundaı isikter aǵzadaǵy aqaýlar men ózgeristerge, qorshaǵan ortadaǵy jaǵymsyz faktorlardyń organızmge keri áserine baılanysty týyndaıdy. Sonymen qatar mamandar onyń tuqym qýalaıtynyn da joqqa shyǵarmaıdy.
Aýrý belgileri de isiktiń ósýine qaraı ózgerip otyrady. Kóbine bel omyrtqa tusy otyrǵanda da, jatqanda da aýyrady, keıde aýyrsyný sezimi arqaǵa, aıaq pen qolǵa beriledi. İsik bolýy múmkin degen kúdik týyndaǵan jaǵdaıda nevropatologtar magnıtti-rezonanstyq nemese kompúterlik tomografıaǵa, keı jaǵdaıda bıopsıaǵa joldama beredi.