Almatyda dárigerler naýqastyń bas mıyna joǵary tehnologıalyq operasıa jasady
Ortalyq qalalyq klınıkalyq aýrýhananyń nevrologıa qabyldaý bólimshesine mı qan aınalymynyń jiti buzýshylyǵy kúdigimen 1981 jyly týǵan pasıent kelip túsken. OQKA baspasóz qyzmetiniń bergen málimetterine súıensek, naýqasty neırohırýrg teksergennen keıin oǵan angıografıa KT júrgizilgen. Taldaý nátıjeleri boıynsha, aldyńǵy qosylǵan kúre tamyrynyń úzilgen qapty anevrızmasy anyqtalǵan, dep habarlaıdy Almaty-akshamy.kz
Neırohırýrg-dáriger Erbol Makejanov shuǵyl túrde joǵary tehnologıalyq operasıa jasady. Iaǵnı, qapty anevrızmanyń assıstensıa balonymen endovaskýlárly embolızasıa jasaldy, ol onyń qaıtadan úzilýin boldyrmaıdy. Atalmysh operasıa az ınvazıvtik emdeý ádisinde negizdelgen. Neırohırýrg-dárigerdiń aıtýynsha, endovaskýlárly neırohırýrgıanyń zamanaýı tehnologıalary bul operasıalardy bas súıekti tespeı jasaý múmkindigin beredi.
«Jambas kúre tamyry arqyly búkil aǵzasy boıynsha arnaıy kateter salynyp, anevrızmaǵa enemiz de, onda arnaıy spıráldardy ornatamyz, sodan soń anevrızma qan aǵymynan jansyzdanyp, osylaısha qan quıylý qaýpiniń aldy alynady. Mundaı jaǵdaıda pasıent jedel túrde hırýrgıalyq aralasýdy qajet etken. Ota sátti ótti. Pasıent jansaqtaý bólimshesinde oıanǵannan soń belsendi túrde shaǵymdanǵan joq, al, burynnan mazasyn alǵan bas saqınasynyń aýrýy tolyǵymen joıylyp, 10-shy táýlikte pasıent nevrologıalyq buzylýsyz aýrýhanadan shyǵaryldy», - dedi Erbol Makejanov.
Aıta ketetini, anevrızmanyń úzilýi bas mıyna qan ketý arqyly pasıentti qatty asqynýǵa, onyń ishinde, gemorrogıalyq ınsýltke, júıke júıesiniń zaqymdanýyna nemese ólimge deıin aparady.