Ońtústik astanadaǵy №7 Qalalyq klınıkalyq aýrýhana hırýrgteri Krona aýrýy, jaraly kolıt, toq ishektiń dıvertıkýlárly aýrýy, tik ishek endometrıozy, ishektegi qaterli isik pen onkologıalyq emes isikterdi josparly túrde laparoskopıalyq tásilmen emdep keledi.
Emdeý mekemesi dırektory, tájirıbeli hırýrg Manas Ramazanovtyń aıtýynsha, aýrýhana hırýrgıa salasyndaǵy sony jetistikterdi, sonyń ishinde otanyń jańa ádis-tásilderin qoldanysqa únemi engizip otyrady.
«Operasıa ádisi naýqastyń densaýlyq jaǵdaıy men qoıylǵan dıagnozǵa qaraı belgilenedi. Ota zaldaryndaǵy jabdyqtar operasıalarǵa tyńǵylyqty daıyndalyp, josparly ota jasaýǵa, pasıent ómirin saqtap qalýǵa, otadan keıingi kezeńniń jeńil ótýin qamtamasyz etýge múmkindik beredi. Bizdiń basty baılyǵymyz – óz isin bes saýsaǵyndaı biletin joǵary bilikti mamandar. Biz zamanaýı qondyrǵylar men kásibı mamandardyń arqasynda kúrdeli operasıalar jasap, jaqsy nátıjelerge qol jetkizip otyrmyz», - dedi Manas Ramazanov.
Bas dáriger jýyrda aýrýhanada bolǵan klınıkalyq jaǵdaılardyń birin mysalǵa keltirdi. Aıtýynsha, 78 jasaǵy pasıent Almatydaǵy №7 Qalalyq klınıkalyq aýrýhanaǵa josparly em alý úshin jatqyzylǵan. Zeınetker aldyn ala ambýlatorıa jaǵdaıynda tekserýden ótken. Dert oshaǵynan alynǵan bıopsıa toq ishektiń tómengi bóliginde búrli isik baryn anyqtap berdi. Jetinshi aýrýhana hırýrgteri ota jasap, isikti alyp tastaý týraly sheshim qabyldady.
«Toq ishektiń sıgmatárizdi bóligindegi isikti laparoskopıalyq ádispen alyp tastaý – saldary jeńil otanyń biri. Manıpýlásıalar shaǵyn ǵana tilik arqyly jasalady. Operasıa barysynda barlyq onkologıalyq prınsıpter saqtalady. Sonymen qatar ár naýqastyń densaýlyq jaǵdaıy mindetti túrde eskeriledi», - dedi Manas Ramazanov.
Ota jasaýshy hırýrg, Proktologıa bólimshesi meńgerýshisi Marat Kalenbaevtyń sózine súıensek, ishektegi isikterdi emdeýde qoldanylatyn laparoskopıalyq ádistiń ashyq operasıalarǵa qaraǵanda birqatar artyqshylyqtary bar. Birinshiden, kishigirim tilik arqyly jasalatyndyqtan tinder kóp zaqymdanbaıdy, aýyrsyný sındromy men ota kezinde qan joǵaltý qaýpi tómen. Naýqastyń qalpyna kelý prosesi de uzaqqa sozylmaıdy, ota jasalǵannan keıin birer kúnde aıaqqa turyp júre bastaıdy. Óz kezeginde, bul tromb túzilý men ishek qyzmetiniń buzylý qaýpin tómendetedi.
«İsik ishek sheńberiniń jartysynan astamyn alyp jatty. Sondyqtan ony endoskopıalyq jolmen alyp tastaý múmkin emes edi. Biz sol jaq laparoskopıalyq gemıkolektomıa ádisin paıdalanǵan durys degen sheshimge keldik. Operasıa sońynda vıdeoendoskopıalyq qurylǵynyń kómegimen ishek bólikterin bir-birine jalǵadyq, nátıjesinde úlken dárettiń ishek arqyly júrý qyzmeti qaıta qalpyna keldi. Aparattyq anastomoz jalpy ota saldarynan bolatyn tigistiń durys bitpeýi syndy basqa da keri áserlerdi tómendetýge múmkindik beredi. Pasıent otadan keıin ekinshi kúni aıaqqa turdy», - dedi Marat Kalenbaev.
Esterińizge sala ketsek, hırýrgıalyq operasıa MÁMS qarajaty esebinen jasaldy. Saqtandyrý paketindegi qyzmetterdi paıdalaný úshin naýqas mindetti túrde saqtandyrylǵan bolýy shart.