8-qabattan qulap ketken er adam aman qaldy.
Oǵan dárigerler birneshe ota jasady, dep habarlaıdy Almaty-akshamy.kz.
Massaget.kz aqparatyna sáıkes, 19 jastaǵy jigit aýrýhananyń qabyldaý bólimine asa aýyr halde jetkizilgen. Naýqas shuǵyl túrde jan saqtaý bólimine jatqyzyldy. Dárigerler onyń mıy shaıqalyp, jabyq bas-mı jaraqaty saldarynan birinshi-ekinshi dárejeli travmatıkalyq shok alǵanyn jáne kóptegen súıekteri synǵanyn anyqtady.
Ortalyq qalalyq klınıkalyq aýrýhananyń Ortopedıa bólimi meńgerýshisi Qanat Táýekelovtiń aıtýynsha, jan saqtaý bólimi qyzmetkerleri aldymen naýqasty jaraqat saldarynan bolǵan shoktan aryltty. Jaǵdaıy turaqtanǵannan keıin eki kúnnen soń dárigerler ota jasaý týraly sheshim qabyldady.
«Eki kezeńmen birneshe ota jasaldy. Birinshi ota "synǵan jambas súıegin ashyq repozısıalaý, plasınamen jáne burandalarmen bekitý" dep atalady. Naýqas esin jıyp, jaǵdaıy jaqsarǵan soń ekinshi ota jasaldy. Bul operasıa barysynda súıek tinderin synǵan jerden bir-birine jalǵap, metal konstrýksıalardyń kómegimen jalǵadyq», – deıdi Qanat Táýekelov.
Mamandar sózine súıensek, joǵary tehnologıalardyń kómegimen jasalǵan operasıa asa kúrdeli manıpýlásıalar qataryna jatady. Mundaı otalar MÁMS paketi sheńberinde ǵana jasalady.
«Biz naýqasty emdeý barysynda onyń ómirin saqtap qalýdy basty maqsat etip qoıdyq, – deıdi Qanat Táýekelov. – Sonymen qatar múgedek bolyp qalmaýy úshin barymyzdy saldyq. Nátıjesinde biz naýqastyń ómirin saqtap qana qoımaı, aıaqqa turǵyzdyq», - dáriger.
Naýqas otadan keıin ekinshi kúni-aq aıaqqa turdy. Ortalyq qalalyq klınıkalyq aýrýhanada reabılıtasıadan ótti.