Ótken túni Alataý adany aýmaǵynda kúdikti kóringen eki Toyota kóliginiń júrgizýshileri polısıa nazaryna ilikti.
Kúdiktilerdiń birnesheýi buryn isti bolǵany belgili boldy, dep habarlaıdy Almaty-akshamy.kz.
«Tártip saqshylaryn kóre sala, júrgizýshi men onyń jolaýshylary jan-jaqqa qasha jónelgen. Alaıda olar qolǵa tústi. Olardyń kólikterin tekserý barysynda kólik ishinen Saıga jáne TOZ qarýlary, pyshaq, travmatıkalyq tapansha, oq tabylyp, tárkilendi. Ustalǵan azamattar Almaty qalasynyń jáne Almaty oblysynyń turǵyndary ekendigi belgili boldy. Eń jasy 19-da bolsa, úlkeni 37 jasta. Qolǵa túsken 8 kúdiktiniń úsheýi buryn sotty bolǵan», – dedi Alataý aýdandyq polısıa basqarmasynyń bastyǵy Talǵat Berkinbaev.
Atalǵan derek sotqa deıingi tergeýdiń biryńǵaı tizilimine QR QK-niń 287-baby boıynsha tirkeldi. Saraptamalyq zertteýdiń qorytyndysyn eskere otyryp, qylmystyq is boıynsha qaýly shyǵaryldy. Tergeý barysynda tárkilengen qarýdyń shyǵý tegi men tıesiligi anyqtalatyn bolady.
QR QPK-niń 201-babyna sáıkes ózge aqparattar tergeý múddesine oraı jarıalaýǵa jatpaıdy. QR Konstıtýsıasynyń 77-babynyń 3-tarmaǵynyń 1-tarmaqshasyna jáne QR QPK-niń 19-baby 1-bóligine sáıkes, zańdy kúshine engen sot úkimimen belgilengenge deıin árbir adam qylmystyq quqyq buzýshylyq jasaýda kinásiz dep tanylady.