Salmaǵy 4 kg sábı quıymshaq túbinde úlken isikpen dúnıege keldi. Bul patologıa qatersiz bolǵanymen, ómirdiń alǵashqy aılarynda qaterli isikke aınalý qaýpi bar.
Sábı týǵannan keıin birden perzenthanadan Balalar shuǵyl medısınalyq kómek kórsetý ortalyǵyna, jańa týǵan nárestelerdiń jansaqtaý bólimine aýystyryldy. Otaǵa tolyq daıyndyq jasalyp, ómiriniń ekinshi kúninde neonataldy hırýrgtar isikti alyp tastady.
«Bala aýrýhanaǵa úlken qatersiz isik — segizkóz-quıymshaq aımaǵynyń teratomasymen tústi. İsik súıek, jumsaq tin jáne kıstozdy qýystan quralǵan. Ota sátti ótti, jáne ádette plasıkalyq hırýrgıada qıyndyqtar týyndaıtyn bolsa da, bul joly bári oıdaǵydaı boldy. Biz plasıkalyq otany sábıge bolashaqta eshqandaı yńǵaısyzdyq týdyrmaıtyndaı etip jasadyq. Bala aman-esen úıine shyǵaryldy», — deıdi Balalar shuǵyl medısınalyq kómek kórsetý ortalyǵynyń hırýrgi Jalǵas Qunıazov.
Ota 75 mınýtqa sozyldy. Hırýrg jáne reanımatolog mamandardyń tynymsyz eńbeginiń arqasynda bala salmaǵy 1 kg bolatyn úlken súıek-kıstozdy isikten qutyldy.
«Segizkóz-quıymshaq teratomasy — neonataldy kezeńde jıi kezdesetin isik. Ol qursaqta qalyptasyp, nárestemen birge ósedi, keıde uryqtyń damýy úshin mańyzdy dárýmenderdi alyp qoıady. Bizdiń jaǵdaıda isik 14*20 sm kólemge deıin ósti. Teratoma tolyǵymen alyndy, balanyń jaǵdaıy qanaǵattanarlyq, úıine shyǵaryldy. Bizdiń ortalyq aıyna 100-ge jýyq jańa týǵan nárestege ota jasaıdy. Týa bitken aqaýlardyń sebepterine ekologıa, klımat, tuqym qýalaýshylyq jáne juqpaly aýrýlar áser etedi. Sonymen qatar, biz týa bitken aqaýlardyń basty sebepteriniń biri áıeldiń júktilik kezinde juqtyrǵan vırýstyq ınfeksıasy ekenin anyqtadyq», — dep túsindirdi bólim meńgerýshisi Samatbek Myrzahmet.
Almatydaǵy Balalar shuǵyl medısınalyq kómek kórsetý ortalyǵynyń irińdi-torakaldy hırýrgıa jáne neonataldyq hırýrgıa bólimshesi 30 tósek-orynǵa eseptelgen. Bul ortalyqqa elimizdiń barlyq aımaǵynan ata-analar balalaryn emdetýge ákeledi.