Sonyń arqasynda operasıadan keıin jaranyń beti tez jazylyp, adamda aýyrsyný sezimi bolmaıdy eken
Sozylmaly gemoroı men zár turmaý zardabyn jyldar boıy tartyp kelgen naýqastar endi tez saýyǵady. Sebebi almatylyq dárigerler ota jasaýda jańa tehnologıa qoldana bastady, dep habarlaıdy Almaty-akshamy.kz Almaty.tv-ge silteme jasap.
Bul – Qalqamandaǵy aýrýhananyń hırýrg-proktolog mamandary búgindikke jasap jatqan 6-operasıa. Ádette mundaı ota 1 saǵatqa sozylatyn. Alaıda jańa ádistiń arqasynda 20-30 mınýtta aıaqtaldy.
Dárigerlerdiń aıtýynsha, jańa tehnologıany qoldana bastaǵaly bir kúnde kóp naýqasty emdeýge múmkindik bar.
«Mende sozylmaly gemoroı bolatyn, soǵan ota jasattym. Talaı jyldan beri aýyryp júrdim. Dárigerlerdiń arqasynda, ekinshiden, jańa tehnologıalyq ádistiń arqasynda qınalmadym, ota jeńil ótti», – dedi naýqas Sandýǵash Temirova.
Dárigerler maqtaǵan, naýqastar jaqtaǵan jańa qurylǵyny medısına mamandary muny sońǵy ýaqytta jıi qoldanyp júr. Sonyń arqasynda otadan shyqqandarda aýyrsyný sezimi bolmaıdy. Aýrýy asqynbaıdy jáne ishektiń anatomıalyq qurylymy tez arada qalpyna keledi. Gemoroıdy emdeýdegi jańa ádistiń burynǵydan basty aıyrmashylyǵy da – osy.
«Sırkýlárly tigetin «Longo» degen apparat bar. Shyrysh qabyǵyn oıyp alyp, sodan soń tigiledi. Kólemi 32-34, ártúrli bolady. Tájirıbemizben salystyrǵanda, burynǵy hırýrgıalyq tásilge qaraǵanda osy ota jeńil ótedi», – dedi №7 qalalyq klınıkalyq aýrýhanasynyń koloproktolog dárigeri Marat Qalenbaev.
Medısına mamandarynyń aıtýynsha, jańa tehnologıamen jasalǵan otadan keıin naýqastar bir jumada qulan taza aıyǵady. Alaıda bul ádisti aýrýyn jasyryp, asqyndyryp alǵandarǵa qoldana almaıdy. Sondyqtan ýaqytyly qaralǵan jón. Álekke salatyn aýrý uzaq otyrýdan ǵana emes, durys tamaqtanbaýdan da shyǵady.