Ortalyq qalalyq klınıkalyq aýrýhana dárigerleri ıntraoperasıalyq neıromonıtorıng júıesiniń kómegimen tuńǵysh ret erekshe ota jasap, julyndaǵy qaterli isikti alyp tastady. Joǵary tehnologıaly operasıa mindetti áleýmettik medısınalyq saqtandyrý esebinen jasaldy, dep habarlaıdy Almaty-akshamy.kz.
Aýrýhananyń neırohırýrgıa bólimi meńgerýshisi Marat Almatovtyń aıtýynsha, atalǵan ádis operasıa kezinde pasıenttiń júıke júıesin zaqymdanýdan barynsha qorǵaıdy. Sonymen qatar, neırohırýrgtiń ota barysynda jasalatyn manıpýlásıalardy bastan-aıaq baqylap otyrýyna múmkindik beredi.
«Operasıa aldynda biz naýqastyń bulshyq etterine jáne organızmniń fýnksıonaldyq mańyzy bar aýmaǵyna arnaıy elektrodtar ornatamyz. Keıin olardy ıntraoperasıalyq neıromonıtorıng júıesine qosamyz. Sol arqyly operasıa barysyn tolyq baqylaýda ustaımyz. Bul júıe manıpýlásıa barysynda júıke júıesiniń zaqymdanýyna jol bermeıdi», - deıdi dáriger.
Joǵary tehnologıaly operasıa naýqastyń 6 jáne 7-shi omyrtqa bóligine jasaldy.
«Eki saǵatqa sozylǵan ota sátti ótti. Pasıenttiń qalypty ómirge qaıtyp oralýǵa tolyq múmkindigi bar. Aıta keteıin, julyndaǵy isik saldarynan júıke qyzmeti buzylady. Ádette, aıaq-qolda álsizdik paıda bolady, sezimtaldyǵy joıylady, jambas pen jynystyq organdardyń fýnksıasy buzylady», - dedi Marat Almatov.
Joǵary tehnologıalardyń kómegimen jasalatyn operasıalardyń aqysy mindetti áleýmettik medısınalyq saqtandyrý qarajaty esebinen tólenedi.