Almaty qalalyq polısıa departamenti bastyǵynyń orynbasary Rýstam Ábdirahmanov Mudarabah Capital qarjy pıramıdasyna qatysty qozǵalǵan is jaıynda túsinik berdi, dep habarlaıdy Almaty-akshamy.kz.
Aıta keteıik, keshe osy pıramıdanyń salymshysy Baǵıla Dosmaıylova astanadaǵy İshki ister mınıstrligi ǵımaratynyń aldynda ózin órtep jibergen bolatyn.
«Baǵıla Dosmaıylova Mudarabah Capital qarjy pıramıdasy isi boıynsha jábirlenýshi dep tanylǵan. 10 sáýirde ol óziniń Instagram paraqshasynda ólimine meni kináli dep sanaýdy ótinip post jarıalady. Óıtkeni, onyń aıtýynsha, men «isti jabýǵa asyǵyp otyr ekenmin». Atalǵan qylmystyq is boıynsha 14 adam kúdikke ilingen, onyń ekeýine halyqaralyq izdeý jarıalandy», - dep atap ótti Rýstam Ábdirahmanov.
Polısıa ókiliniń sózine sensek, alty kúdikti qamaýda otyr, úsheýi kepilmen bosatylǵan, taǵy ekeýi úıqamaqqa alynǵan, bireýi eshqaıda ketpeıtini jaıly qolhat bergen.
Qazirgi tańda qylmystyq proseske 14 adam tartyldy, olarǵa Qylmys kodeksiniń 217-baby 3-bólimi boıynsha aıyp taǵylǵan.
"Taıaý arada proseske qatysýshylar qylmystyq ispen tanysyp bolǵan soń, is sotqa jiberiledi. Kelgen materıaldyq shyǵyndy óndirý máselesin sot qarap sheshedi. Óz atymnan ol kisiniń tezirek jazylyp ketýine tilektespin. Ómirlik qıyn jaǵdaıǵa tap bolǵan kez kelgen adam emosıalyq kúızeliske ushyraıtyny belgili", - deıdi polısıa departamenti bastyǵynyń orynbasary.