Naýqastyń bir jyl buryn ishi úlkeıe bastapty.
Almatylyq dárigerler naýqastyń ishinen salmaǵy 2 keliden asatyn isikti alyp shyqty, dep habarlaıdy Almaty-akshamy.kz qalalyq densaýlyq saqtaý basqarmasyna silteme jasap.
Qalalyq jedel járdem aýrýhanasyna túsken 52 jastaǵy er adam ish qýysyndaǵy aýrýshańdyq pen aýyrlyq paıda bolǵanyn aıtty. Al bir jyl buryn ishi úlkeıe bastady. Biraq osy ýaqytqa deıin yńǵaısyzdyq pen aýyrsyný sezilmepti. Sol sebepti medısınalyq tekseriske birden barmaǵan. Kompúterlik tomografıa naýqastyń ishinde úlken isik anyqtaldy.
Konsılıýmde er adamǵa ota jasaýǵa sheshim qabyldandy. Eki keliden asatyn isikti alyp shyǵýǵa 2,5 saǵattan astam ýaqyt ketti. Ota jasaý bóliminiń meńgerýshisi Nurken Jeldibaevtiń aıtýynsha, ish qýysynan tys keńistikte ornalasqan isik barlyq organ men ishekti oń jaqqa yǵystyryp, ishtiń teń jartysyn alyp jatty.
"Operasıanyń kúrdeliligi túzilimniń ish qýysynan tys keńistikte ornalasyp, shap aımaǵyna ótip ketkeninde boldy. Munda túzilimdi tutas alyp shyǵarý mańyzdy ekenin aıtyp ótý kerek. Sondyqtan biz shap aımaǵynan qosymsha tilik jasap, san arterıasynyń janynan sannyń joǵarǵy úshten bir bóligine deıin óttik. Onyń ústine túzilim shekaralary aortaǵa jaqyn jatyp, sol jaq búırektiń shekarasy jáne nesepaǵardyń boıymen ketken. Bul óte qaýipti boldy", - deıdi Nurken Jeldibaev.
İsik 25-30 santımetrge deıin ósip ketti. Al salmaǵy 2,240 kelige jetken. 7 kúnnen soń naýqas úıge shyǵaryldy.
Dárigerler aǵzadaǵy kez kelgen ózgerister kezinde medısınalyq tekseristen ótýge keńes berip otyr.