Almatydaǵy №2 Qalalyq balalar klınıkalyq aýrýhanasynda sırek kezdesetin aıaq-qol kemistigine shaldyqqan balalarǵa ota jasaldy. Operasıa barysynda buryn-sońdy qazaqstandyq klınıkalarda qoldanylmaǵan eksklúzıvti tehnologıalar paıdalanyldy. Otalardy uıymdastyrýǵa «Mıloserdıe» eriktiler qoǵamy» qoǵamdyq qory men «Samruk-Kazyna Trust» áleýmettik jobalardy damytý qory muryndyq boldy, dep habarlaıdy aýrýhananyń baspasóz qyzmeti.
«Sheberlik klasy sheńberindegi otalardy bizdiń dárigerler men qol-taban mıkrohırýrgıasy salasynda álemge tanymal maman, Reseı Halyqtar dostyǵy ýnıversıteti travmatologıa jáne ortopedıa kafedrasynyń profesory Igor Golýbev birlesip jasady. Biz aıaq-qoldyń týabitti jáne júre paıda bolǵan kemistikterine shaldyqqan kishkentaı bes pasıentke MÁMS sheńberinde ota jasadyq», - deıdi №2 QBKA dırektory Marat Rabandıarov.
Klınıkalyq jaǵynan qaı-qaısysy da sırek kezdesetin aýrýlarǵa jasalǵan biregeı operasıalarǵa reseılik mamanmen qatar №2 QBKA Travmatologıa jáne ortopedıa bólimshesi meńgerýshisi Erlan Sadyrbalın, balalar hırýrgi Úljan Soltanbekova qatysty.
2023 jyldyń shildesinde 6 jastaǵy Adel men anasyn júrginshi jolaǵynan ótip bara jatqan kezde kólik qaǵyp ketken. Anasy qatty jaraqat almaǵanmen, dóńgelek astynda qalyp qoıǵan qyzdyń aıaǵyn kesip tastaýǵa týra kelipti. Onyń ústine, saýsaqtary da qatty zaqymdanǵan. Halyqaralyq sheberlik klasy barysynda Adel kezekti hırýrgıalyq em alyp, dárigerler onyń saýsaqtarynyń pishinin qalypqa keltirýge kúsh saldy.
Ota ústeline jatqyzylǵan ekinshi balanyń esimi – Shyntas. Ol 2020 jyly shomylyp júrip kópirden sýǵa sekirgen. Sol jaq ıyǵyn soǵyp, omyrtqasyna, júıke júıesine zaqym kelgen, sol qoly jansyzdanyp salbyrap qalypty. Sodan beri balaǵa eki ret kúrdeli ota jasaldy. Sheberlik klasy barysynda taǵy bir hırýrgıalyq ota júrgizildi.
2022 jyldyń jazynda ata-anasy Nurálıdiń oń jaq qolyndaǵy úsh saýsaǵynyń qımyldamaı qalǵanyn ańǵarǵan. Saýsaqtyń qozǵalysyn qalpyna keltirý úshin oǵan da atalǵan sheberlik klasy barysynda shuǵyl túrde ota jasaldy.
Al, ata-anasy Ratmırdiń sol qolynyń qısaıyp ketkenin 2023 jyly jazda baıqapty. Ókinishke oraı, isik saldarynan qoldyń ósýi tejelip, búginde oń qol sol qold 5 sm qysqa, al der kezinde ota jasalmasa Ratmırge bir qoldan aıyrylyp qalý qaýpi tónip tur. Sondyqtan sheberlik klasynda bul balaǵa da qoldyń uzyndyǵyn qalpyna keltirýge baǵyttalǵan rekonstrýksıalyq ota jasaldy.
Qorlardyń kómegimen uıymdastyrylǵan sheberlik klasy arqyly aýyr kemistik zardabyn tartyp kele jatqan balalar álemdik deńgeıdegi mamannyń kómegine júginip, joǵary tehnologıalyq ota jasatýǵa múmkindik aldy. Oǵan qosa, reseılik profesor 20 naýqasqa tegin konsýltasıa berip, 17 qazaqstandyq mamanǵa teri plasıkasy salasyndaǵy ınovasıalyq tehnıkalar men mıkrohırýrgıanyń qyr-syryn úıretti. Bul aldaǵy ýaqytta osyndaı kúrdeli otalardy bizdiń elimizde de jasaı bastaýǵa múmkindik beretin strategıalyq qadam, deıdi Marat Rabandıarov.