Almatylyq dárigerler nemis neırohırýrgimen birlesip gıdrosefalıa sındromymen aýyratyn birneshe balaǵa asa kúrdeli ota jasady
Ońtústik astanadaǵy №2 Balalar qalalyq klınıkalyq aýrýhananyń neırohırýrgteri nemis elinen kelgen mamanmen birlesip gıdrosefalıanyń kúrdeli túrimen aýyratyn balalarǵa ota jasady. Dárigerler jańa ádisti qoldana otyryp, elimizdiń túpkir-túpkirinen kelgen 8 balaǵa operasıa jasap shyqty.
«Operasıalar «Mıloserdıe» qoǵamdyq qory uıymdastyrǵan halyqaralyq sheberlik klasy sheńberinde jasaldy. Oǵan balalar gıdrofesalıasy máselesimen aınalysatyn germanıalyq profesor Ýlrıh-Vılgelm Tomale qatysty. Sheberlik klasyna respýblıkanyń ózge óńirlerinen, sondaı-aq kórshiles Qyrǵyzstan men Tájikstannan kelgen 54 dáriger qatysty. Olar sheberlik klasy barysynda shetelderde óte qymbat turatyn operasıaǵa qatysyp, tájirıbe almasýǵa múmkindik aldy. Otalardyń bári de jańa ıntraventrıkýlárly neıroendoskopıalyq júıe negizinde jasaldy», - dedi №2 BQKA dırektory Marat Rabandıarov jýrnalıserge.
Aýrýhananyń neırohırýrgıa bólimshesi meńgerýshisi Danıar Sabdenálıevtiń aıtýynsha, atalǵan sındromǵa shaldyqqan balalardyń mıyna suıyqtyq jınalady. Der kezinde dıagnoz qoıyp, em-dom qabyldamasa naýqastyń ómirine qaýip tónedi. Em-domnyń tabysty bolýy gıdrosefalıanyń mıdy zaqymdaý deńgeıine, aýrý belgilerine, aýrý saldarynan paıda bolǵan aqaýlarǵa baılanysty. Keıbir balalar anasynan osy sındrommen týylsa, endi bireýlerdiń mıynda sý júre kele paıda bolady.
«Operasıa barysynda endoskopıalyq kamerany mıdyń qarynshalaryna engizip, kıstalardy bir-birine qostyq. Onyń qıyndyǵy da osynda. Ota aldaǵy ýaqytta mundaı hırýrgıalyq aralasýdy boldyrmaýǵa jáne pasıenttiń qalypty ómirge oralýyn qamtamasyz etýge baǵyttalǵan. Búgingi manıpýlásıalardyń balalarǵa kómekteseri sózsiz. Ásirese, nevrologıalyq aýytqýlar paıda bolǵan jáne kórý qabileti nasharlaǵan naýqastar operasıa nátıjesin birden seze bastaýy tıis», - dedi Danıar Sabdenálıev.
Buryn mundaı hırýrgıalyq operasıalar 2-3 kezeńmen jasalatyn. Saldarynan balalar ota men narkoz saldarynan kóp qınalyp, óz-ózine kelýine kóp ýaqyt qajet bolatyn. Jańa tásildiń arqasynda asa kúrdeli otany bir ýaqytta jasaýǵa múmkindik týyp otyr.
Máselen, kishkentaı Nuraı Baǵdaýlettiń dúnıe esigin ashqanyna 3-aq aı bolypty. Gıdrosefalıa sındromyna ishte jatqanda shaldyqqan sábı júktiliktiń 28-shi aptasynda týylǵan. Dıagnoz qoıylǵannan keıin ótken jyly qarasha aıynda oǵan birden ota jasaldy. Qazir sheberlik klasy barysynda taǵy da em aldy.
«Sábıdiń mıy din-aman. Suıyqtyq tek mı qarynshasyna túsken. Meniń bilýimshe, buryn balanyń basyna qoıylatyn shýntty ár 5 jyl saıyn aýystyrý qajet bolatyn. Búgin qoıǵan shýnttyń ómir boıy turatynyn estip qýanyp qaldym. Bizdiń neırohırýrgtarymyz ben nemis elinen kelgen mamannyń arqasynda operasıa sátti ótti. Buıyrsa, juma kúni aýrýhanadan shyǵamyz», - deıdi anasy Tolqyn Taldybaeva.
Balalardy aýrýhanada emdeýge, dári-dármekke, operasıaǵa qajetti materıaldar quny MÁMS qarajaty esebinen tólendi.
«Mıloserdıe» qory shetelden dáriger shaqyryp, sheberlik klasyn uıymdastyrdy. Sonyń arqasynda ata-analar balasyn shetelge aparyp emdetý mashaqatynan qutyldy.
Dárigerlerdiń aıtýynsha, basyna ota jasalǵan balalardyń bárinen de jaqsy nátıje kórýge bolady. Jalpy, tez qalpyna kelý úshin mundaı operasıalardy meılinshe erte, bala kishkentaı kezinde jasaǵan durys. Ótken jyly №2 aýrýhanada «mı gıdrosefalıasy» dıagnozy qoıylǵan 200-ge jýyq balaǵa osyndaı operasıa jasalǵan.