90 jyldyq tarıhy bar №5 qalalyq klınıkalyq aýrýhana - elimizdegi bas medısınalyq mekeme.
Almatydaǵy №5 qalalyq klınıkalyq aýrýhanasynda bir jyl ishinde qulaq, muryn, jaqqa 22 myńnan asa ota jasalypty, dep habarlaıdy Almaty-akshamy.kz.
Kúni-túni tynbaı eńbek etetin jandar aýyr jaǵdaıdaǵy naýqastardy da emdeıdi. Jan aýyryp, súıek syzdaǵanda ǵana qadirin biletin mamandyqqa qurmet pandemıadan keıin tipti erekshe boldy, dep jazady Almaty.tv.
90 jyldyq tarıhy bar №5 qalalyq klınıkalyq aýrýhana - elimizdegi bas medısınalyq mekeme. Onda dárigerler Almaty jáne respýblıka boıynsha eresekter jáne balalarǵa medısınalyq shuǵyl kómek kórsetip, túrli deńgeıdegi ota jasaıdy. Aptanyń jeti kúni táýlik boıy tynbaı jumys isteıtin aýrýhananyń qabyldaý bólimi kúnine 800-den asa naýqas túsedi. Dárigerler bet-jaq aımaǵyndaǵy jaraqatty, irińdi qabyný prosesterin emdeıdi.
«Ár salanyń óziniń qıyndyǵy bolady. Ártúrli jaǵdaı bolady. Adamnyń ómirin aman alyp qalý úshin biz barymyzdy salamyz. Ol - bizdiń basty paryzymyz», – dedi №5 qalalyq klınıkalyq aýrýhanasy qabyldaý bóliminiń bet-jaq hırýrgi Aıdos Aımuhanbetov.
25 jyldyq tájirıbesi bar Natalá Glevskaıa dárigerlik mamandyqty erlikke balaıdy. Óıtkeni, aq halatty abzal jan ataný bilimdilikti, iskerlikti jáne mol tájirıbeni talap etedi deıdi. Qoǵamdaǵy orny erekshe sanalatyn, únemi izdeniste júretin mamandyq ıesi jumysyn shyn jaqsy kóretinin aıtady.
«Shyny kerek, dáriger bolýdy bala kezden armandadym. Qazir osy aýrýhanada eńbek etemin. Biz Almaty qalasy boıynsha "jedel járdemmen" jetkizilgen naýqastardy qabyldap, sondaı-aq josparly em de júrgizemiz. Oǵan qosa, Qazaqstannyń túkpir-túkpirinen de naýqastar em izdep keledi. Táýligine 200-den asa balalarǵa shuǵyl kómek kórsetemiz», – dedi №5 qalalyq klınıkalyq aýrýhanasy balalar qabyldaý bóliminiń dárigeri Natalá Glevskaıa.
Jańashyldyqqa qashanda janymyz qushtar degen dárigerler Reseı, Avstrıa, Germanıa, Izraıl jáne AQSH klınıkalarynda ınovasıalyq tehnologıalardy meńgergen. №5 qalalyq klınıkalyq aýrýhanada 130 dáriger qyzmet etedi. Olardyń arasynda medısına ǵylymdarynyń doktory, "Altyn dáriger" jáne "Densaýlyq saqtaý úzdigi" ataǵymen marapattalǵan aq halatty abzal jandar bar.