Egde jastaǵy áıelde júrek talmasynyń barlyq belgileri baıqalǵan.
Ushaq Almatyǵa qonǵansha 4 saǵat boıy medısına qyzmetkerleri reanımasıalyq sharalardy júrgizip, shuǵyl kómek kórsetti, dep habarlaıdy Almaty-akshamy.kz qalalyq densaýlyq saqtaý basqarmasyna silteme jasap.
Naýryzdyń 24-inen 25-ine qaraǵan túni qazaqstandyq týrıser mysyrlyq Sharm-el-SHeıh kýrortynan Almatyǵa qaıtyp kele jatqan.
Ushýdyń ekinshi saǵatynda "Air Cario" bortyndaǵy 72 jastaǵy jolaýshy aýyryp qaldy. Sol sátte oǵan kómekke Almaty qalasy №4 qalalyq aýrýhananyń dárigeri Nurjan Ájibekov pen S.D. Asfendıarov atyndaǵy Qazaq ulttyq medısına ýnıversıtetiniń úsh stýdenti kómekke kelgen.
"Bir kezde aldynda otyrǵan áıel ábigerge tústi, ári onyń qolynda nárestesi boldy. Sodan keıin stúardtar ushaqta dárigerlerdiń bar-joǵyn surady. Medısına ýnıversıtetiniń stýdentteri jáne men jaýap berdik. Bastapqy tekserý kezinde mıokard ınfarktisiniń damý qaýpi bar dep kúdiktendim. Áıel es-tússiz jatqan, oǵan deıin qusqan, tamyr soǵysy álsiz, qan qysymy tómen boldy. Sodan keıin hattama boıynsha áreket ettik: qusýdan asfıksıany boldyrmaý úshin aýyz-jutqynshaqty tazaladyq, sodan keıin júrekke túsetin júktemeni azaıtý úshin naýqastyń aıaǵyn 60°-qa kóterdik. Naýqasty ottegi beretin Bobrov apparatyna qostyq. Stýdentter belsendi túrde kómektesti. Qabyldanǵan sharalardyń nátıjesinde qan qysymy 80/60-tan 130/80-ge, qanyqtylyq 87-den 96-ǵa kóterildi. Áıel esin jıa bastady. Aldymyzda kelesi másele týyndady: keri ushyp, jaqyn jerdegi Iran eline qonyp, jolaýshyny aýrýhanaǵa jetkizý nemese ottegi jaǵdaıyn saqtap, Qazaqstanǵa ushýdy jalǵastyrý. Qudaıǵa shúkir, bul reıs barlyq qajetti dári-dármekpen jáne quralmen jabdyqtalǵan bolatyn, bul bizge naýqasqa barynsha kómek kórsetýge múmkindik berdi - úıge ushamyz degen sheshim qabyldandy. Bizdiń mindetimiz – reıs sońyna deıin ómirlik mańyzdy kórsetkishterdi saqtaý boldy", - deıdi sol ushaqpen ushqan Almaty №4 qalalyq klınıkalyq aýrýhana neırohırýrgıa bólimshesiniń meńgerýshisi Nurjan Ájibekov.
Nurjan Ájibekov – bas mı men omyrtqaǵa eń kúrdeli joǵary tehnologıalyq operasıalar jasalatyn Almaty qalasy №4 qalalyq aýrýhananyń neırohırýrgıa bólimshesiniń meńgerýshisi. Dáriger jyl saıynǵy eńbek demalysyna shyǵyp, sol kúni otbasymen demalystan keıin úıine qaıtyp bara jatqan.
Kýágerlerdiń aıtýynsha, ushaqta bolǵan maman men medısına ýnıversıtetiniń stýdentteri áıeldiń jaǵdaıyn turaqtandyryp, esin jıǵyzyp, jaǵdaıyn baqylaǵan. Ushaqta kómek kórsetken S.D. Asfendıarov atyndaǵy QazUMÝ stýdentteriniń esimderi de belgili: Qajyrov Dáýlet, Jarqyn Rahat jáne Saıda Barmaǵambetova.
Týystarynyń aıtýynsha, Kúljamal Rahmettýllaqyzy Almatyǵa kelgennen keıin birden aýrýhanaǵa túsken, jaǵdaıy jaqsy.