Almaty qalasynyń ákimi Erbolat Dosaevtyń Túrksib aýdany turǵyndarymen kezdesýinde Almaty temirjoly mańyndaǵy másele kóterildi, dep habarlaıdy Almaty-akshamy.kz.
Turǵyn saýaly:
Meniń eki suraǵym bar. Birinshisi Almaty temirjol vokzalyna qatysty. Jeńil kólik qozǵalysyn retteý kerek. Vokzal aldynda únemi keptelis bolyp turady. Bul kólik tyǵyny Sholohov kóshesine deıin sozylady. Onyń ústine Aqan seri kóshesimen kele jatqanda solǵa burylýǵa tyıym salyndy. Almatydaǵy birinshi vokzalǵa 50 jyl bolady. Sondyqtan oǵan az da bolsa jóndeý jumystaryn júrgizýińizdi suraımyz.
Ekinshi másele, 1927 jyly qurylysy bastalyp, 1930 jyly aıaqtalǵan Túrksibtiń júz jyldyǵy jaqyndap qaldy. Bizdiń aýdan osy ataqty temirjoldyń atymen atalǵany belgili. Sondyqtan onyń ǵasyrlyq mereıtoıyna oraı Almaty-1 temirjol vokzalynyń aldyna Túrksib zamanynan qalǵan parovoz qoıylsa deımiz. Aýdan ákimdigimen sóılestik, túsinistik bar. Osy máseleni qarastyryp, ruqsat berýińizdi suraımyz.
Almaty qalasy ákimi Erbolat Dosaevtyń jaýaby:
Birinshiden, eki stansıa da óte mańyzdy kólik ınfraqurylymy júıesi bolyp tabylady. Almaty-1 temirjol vokzaly mańyndaǵy aýmaqty retke keltirý kerek. Vokzal mańynda avtoturaq retinde uıymdastyrýǵa bolatyn jeke aımaq bar. Men jer qatynastary bólimine osyny qaraýdy tapsyrdym. Bálkim, aýmaqty kóp kólikterden bosatý úshin kóp deńgeıli avtoturaqtar salý kerek bolar.
Jolaýshylardy alyp ketý úshin syzyq boıyna tizilgen taksı júrgizýshileriniń arqasynda keptelis paıda bolady. Solǵa burylýǵa kelsek, qalalyq mobıldilik basqarmasyna tez arada jaǵdaıdy anyqtap, sheshim qabyldaýdy tapsyramyn. Trafıkke keletin bolsaq, jaǵdaıdy sońyna deıin anyqtap, másele sheshilýi tıis. Vokzaldy jóndeý úshin, eki stansıany da Qazaqstan temirjolyna qaıtaramyz dep sheshtik. Olar jóndeý jumystaryn josparlap, vokzaldy damytý úshin qarjy salýdy kózdep otyr.
Túrksibtiń júz jyldyǵyna kelsek, ákimderge, qalalyq komısıaǵa tapsyrma beriledi. Aýdannyń ataýy osy temirjoldan shyqqandyqtan, bul mereke erekshe atalýy da tıis. Joǵaryda aıtyp ótkenimdeı, 2023 jyly Túrksib aýdanyna 85 jyl tolady. Osyǵan baılanysty sizderdi taǵy da quttyqtaımyn! İs-sharalar uıymdastyrylady. Máslıhat óz jumysyn bastaǵan boıda bıylǵy jyly Túrksib óńiriniń barlyq ózekti máselelerin sheshýdi surap, oǵan júginetin bolamyz.