Almatyda ornalasqan Qazaqstan Respýblıkasy Memlekettik Ortalyq mýzeıinde jetkinshekterdiń ıgiligi úshin birneshe úıirme jumys isteıdi.
Shyǵarmashylyqqa jaqyn balalar úıirmelerge árqashan qýana da asyǵa keledi deıdi mýzeı mamandary.
Atalmysh mýzeıdiń pedagogtary jýyrda «SheberKIDS» qolóner úıirmesi (jetekshisi Aıjan Qurbanova) sheńberinde kishi jáne úlken toptarǵa arnalǵan sheberlik sabaqtaryn ótkizdi. «Qazaqtyń ultyq oıý-órnekteri» taqyrybynda balalar kıizden oıý-órnek («qoshqar múıiz», «túıe izi», «qus qanaty») kestelengen sándik tósenishter jasady.
Al «Almaty – ortaq úıimiz» aksıasy aıasynda «Shyǵarmashylyqtyń baspaldaqtary» ınklúzıvti úıirmesinde (jetekshisi Zýhra Baıanova) órenderge arnalǵan «Qyzǵaldaqtar qýanysh syılaıdy» taqyrybynda ınklúzıvti sabaq ótkizildi.
Sabaqqa «Bıik beleske baǵyt» qoǵamdyq qory jáne «Shyńǵa órleý» áleýmettik klýbynyń balalary shaqyryldy. Úıirmeniń uıytqysy bolǵan úlkender kishkentaı dostarǵa Almatynyń kórikti jerleri týraly aqparat berdi jáne tabıǵatty súıý, ony aıalaı bilý kerektigin túsindirdi. Almatyda ósetin qyzǵaldaqtar týraly málimetter aıtylyp, balalar túrli-tústi qaǵazdan «Qyzǵaldaq» aplıkasıasyn jasady.